سينابون.. أحلى أكلة لأوقات دافية

لكل عشاق السينابون ولكل الناس اللي بتحب طعم القرفة، هنقدّم لكم النهارده طريقة سهلة لتحضيره..
سينابون بصوص الزبدة
المقادير:
8 كوب دقيق
ملعقة كبيرة سكر
2 كيس خميرة فورية
2 ملعقة صغيرة ملح
كوب ماء دافي
2/3 كوب سكر
كوب لبن دافي
2/3 كوب زبدة
2 بيضة مخفوقة
للحشو:
كوب زبدة سايحة
3 ملعقة كبيرة قرفة
13⁄4 كوب سكر
للصوص:
4 كوب سكر بودرة
2/3 كوب زبدة سايحة
4 : 8 ملعقة كبيرة مية سخنة
فانيليا
الطريقة:
1- اخلطي الخميرة مع المية الدافية وملعقة السكر في طبق صغير، وفي طبق تاني اخلطي اللبن مع 2/3 كوب سكر والزبدة السايحة والملح والبيض، وقلّبيهم مع بعض كويس جدا، وبعد كده ضيفي عليهم الخميرة.
2- ضيفي عليهم نصف كمية الدقيق واضربيهم بالمضرب الكهربي لغاية ما العجينة تبقى ناعمة والدقيق يدوب تماما، وبعد كده ابدئي ضيفي باقي كمية الدقيق بالتدريج مع الاستمرار في تقليبهم لغاية ما تحسّي إن العجينة بقت متماسكة، وخلّي بالك إن عجينة السينابون بيكون ملمسها لزج شوية.
3- حطّي العجينة على رخامة المطبخ بعد ما ترشّي عليها طبقة من الدقيق، وابدئي لمّيها بإيدك لمدة 5 : 10 دقايق، وبعد كده حطّيها مرة تانية في طبق غويط مدهون بطبقة من الزبدة، وغطّيه وسيبي العجينة ترتاح في مكان دافي لغاية ما حجمها يتضاعف بعد حوالي ساعة ونصف.
4- بعد كده هاتي العجينة وافرديها بالنشّابة على الرخامة بعد ما ترشي عليها طبقة من الدقيق، لغاية ما العجينة تبقى على شكل مستطيل سمكه ما يزيدش عن 1 سم.
5- ادهني العجينة بنصف كوب من الزبدة السايحة اللي إنتي مجهزاها للحشو، وبعد كده كوب ونصف من السكر بتاع الحشو مع القرفة، ووزّعي الخليط ده على العجينة،وممكن تضيفي عليها كمان كمية من عين الجمل والفستق لو عايزة.
6- لفّي العجينة على الحشو، واقفليها من عند الأطراف كويس، وبعد كده قطّعيها بالسكينة لحلقات عرضها من 3 : 5 سم، وبعد كده هاتي الصينية اللي هتسوي فيها السينابون وادهنيها بنصف كوب الزبدة اللي باقي عندك من مكونات الحشو، ورشي عليها ربع كوب السكر الباقي، وسيبي قطع السينابون ترتاح في مكان دافي لغاية ما حجم العجينة يتضاعف بعد حوالي 45 دقيقة.
7- دخّلي الصينية في فرن ساخن على درجة حرارة متوسطة، وسيبيها لمدة 25 : 30 دقيقة لغاية ما تستوي والسينابون يبقى لونه دهبي مائل للبني، وبعد كده طلّعي الصينية وسيبي السينابون يبرد شوية في الوقت اللي بتحضّري فيه الصوص.
8- لتحضير الصوص، اخلطي الزبدة مع السكر البودرة والفانيليا وضيفي معاهم المية السخنة ملعقة ملعقة، لغاية ما تحسي إن الصوص وصل للسمك اللي إنتي عايزاه، وبعد كده حطّيه على قطع السينابون الدافية وقدّميه.. وبالهنا والشفا.
خلصت وصفتنا النهارده..
استنونا كل يوم مع أكلات جديدة..
سلام،،،