سينابون بالقرفة وعين الجمل على "سفرة دايمة"

هنقدّم لكم النهارده على "سفرة دايمة" طريقة سهلة لعمل السينابون رول بالقرفة، جرّبوه وابعتوا لنا رأيكم فيه، وكمان كل الوصفات اللي عايزين تعرفوها.

سينابون رول بالقرفة
المقادير:
مقادير العجينة:
1/ 4 كوب ميه سخنة
قطعة خميرة بيرة
1/ 3 كوب سكر
3/ 4 كوب لبن
4 ملاعق كبيرة زبدة
3 صفار بيض
ملعقة كبيرة بشر برتقال
1 1/ 4 ملعقة صغيرة ملح
4 كوب دقيق
مقادير الحشو:
1/ 2 كوب سكر بني
ملعقة كبيرة قرفة
4 ملاعق كبيرة زبدة
مقادير الصوص:
3/ 4 كوب سكر بني
4 ملاعق كبيرة زبدة
3 ملاعق كبيرة عسل
1 1/ 2 كوب عين جمل مفروم خشن
الطريقة:
1- أوّل حاجة اخلطي الخميرة مع الميه السخنة وملعقة صغيرة سكر، واعجنيهم في العجانة أو اضربيهم بالمضرب الكهربائي، واستمرّي في الخفق لمدة 5 دقائق لحد ما الخميرة تدوب تماما وتعمل رغوة.
2- وبعدين ضيفي اللبن والزبدة وباقي كمية السكر وصفار البيض وبشر البرتقال والملح و 3 أكواب من الدقيق، واخفقيهم على سرعة منخفضة لحد ما يمتزجوا، وبعدين اجمعي الخليط بملعقة، واستمرّي في خفقه مرة كمان على سرعة منخفضة.
3- بعدين ضيفي كوب الدقيق المتبقّي ببطء، وبعدين خلّي السرعة متوسّطة، واستمرّي في الخفق لمدة 3: 5 دقائق لحد ما تبقى العجينة ناعمة ولزجة شوية، ولو حسيتي إنها لسه رطبة ممكن تزوّدي شوية دقيق لحد ما العجينة تبقى مضبوطة.
4- شكّلي العجينة على شكل كرة، وحطّيها في طبق غويط مدهون زبدة، وبعدين غطي الطبق بغلاف بلاستيك وحطّيه في مكان دافي، وسيبيه لمدة ساعة أو ساعتين لحد ما حجم العجينة يتضاعف، وبعدين انقليها على لوحة تقطيع وسيبيها لمدة 20 دقيقة.
5- في الوقت ده اعملي الحشو؛ وده بإنك تخلطي القرفة مع السكر البني، وبعدين سيّحي الزبدة، وافردي العجينة بسمك 1 سم وادهنيها بالزبدة السايحة، ورشي عليها خليط القرفة والسكر، وبعدين ابدئي لفّيها بالعرض لحد ما تعمل شكل أسطواني، وقطّعي العجينة لحلقات عرضها 3 سم.
6- بعد كده اعملي الصوص؛ حطي السكر والزبدة والعسل على نار هادية، وقلبيهم لحد ما يدوبوا تماما، وبعدين صبيه في القالب اللي هتسوّي فيه ورشّي عليه عين الجمل، وابدئي رصّي حلقات السينابون عليه، واضغطي عليها بهدوء علشان تمتزج مع عين الجمل.
7- غطّي القالب بغلاف بلاستيك، وسيبي مسافة بسيطة علشان السينابون يرتفع، وحطي القالب في التلاجة طوال الليل.
8- طلّعي القالب من التلاجة، وسيبيه يبرد شوية لحد ما تسخني الفرن، وبعدين دخلي السينابون الفرن على درجة حرارة عالية، وسيبيها لمدة 30 : 35 دقيقة لحد ما يبقى لونها دهبي، وبعدين خرّجيها واقلّبيها على صينية التقديم وسيبيها تبرد شوية، وقدّميها بالهنا والشفا.

خلصت حلقتنا النهارده..
استنونا كل يوم مع أكلات جديدة..
سلام،،،