السلام عليكم.. شكرا على الموقع الهايل ده.. أنا فتاة عندي 35 سنة، وحظّي في الجواز وحش جدا والحمد لله؛ بمعنى إن مافيش ولا شخص اتقدّم لخطبتي إلى الآن، وده بدون مبالغة؛ برغم إني مش وحشة للدرجة دي؛ يعني أنا شكلي عادي لا حلوة ولا وحشة، وأخلاقي الكل بيشهد بها، وماعنديش أي إعاقات الحمد لله، ولكن باقول الحمد لله طبعا ماحدش عارف الخير فين. بس حاولت الاشتراك في مواقع زواج، قلت يمكن لما يتكلّموا معايا ويشوفوا طريقة تفكيري وأسلوبي يتشدّوا لي، وفعلا ده اللي بيحصل بعد معرفتي بأي حد بيشكر فيّ وفي أخلاقي وثقافتي، واتعرّفت على ناس عن طريق الشات في المواقع.. والناس دايما بتطلب منّي صورة علشان يشوف اللي هيتجوّزها، وأنا باخاف من الأشخاص على النت؛ لأنهم ممكن يلعبوا بالصورة وكده، وأنا حريصة جدا في الموضوع ده
بس بارجع أقول لنفسي طب ما هو من حقّه يشوف البنت اللي هيتقدّم لها شكلها عامل إزاي، بس خوفي من اللعب بالصورة بيخلّيني ماعرضش الصورة، وأقول لأي حد تعالى شوفني في بيتنا؛ فمش بيوافق؛ لأن أنا من الصعيد، واللي باتعرّف عليهم من القاهرة أو إسكندرية، وماحدش عايز ييجي المسافة دي من غير ما يكون واثق تمام الثقة إنه موافق عليّ شكلا وموضوعا وده حقّه. وردّهم بيكون إنتي تفكيرك ساذج برغم سنّك ده، وأنا مش باعتبر دي سذاجة قد ما هي أصول، وحذفت ناس كتير من عندي بسبب الصورة ممكن يكونوا فرصة، ولكن دايما باقول لنفسي وأنا أضمن منين إنهم فرصة؟! قولوا لي رأيكم إيه وأتصرّف إزاي في موضوع الصورة؟ وهل ممكن أعرض الصورة علشان يشوفني بشكل آمن يمكن ألاقي شريك حياتي؛ لأني فعلا أنا نِفسي أتجوّز وأفرح بنفسي، ويكون ليّ أولاد، ولكن مش عايزة أضرّ نفسي أو أرخّصها؛ أنا مؤمنة جدا إن مسألة تأخير جوازي لحد السن ده نصيب، وكمان ابتلاء من ربنا، ولكن لمّا بالاقي فرصة باحاول أغتنمها بشياكة ولباقة وأصول وعقلانية، وشكرا.. أنا عارفة إني طوّلت عليكم باعتذر لكم. may صديقتنا العزيزة.. مشكلتك فكّرتني بحادثة ظريفة كانت حصلت مع أمي في طابور العيش، إنتي عارفة الطوابير عادة بتطوّل؛ فالناس يبدأوا يتصاحبوا على بعض ويدردشوا، فأمي اتعرّفت على بنت، وسألتها إنتي ساكنة فين؟ فقالت لها البنت: "كذا"، وكذا دي منطقة بعيدة جدا وفيها أكتر من فرن؛ فأمي قالت لها بس إنتم عندكم أفران كتير.. إيه اللي جايبك هنا؟ راحت البنت قالت لها: علشان الناس تشوفني، يمكن حد يشوفني وأعجبه فيتقدّم لي، رجعت أمي حكت لي عن البنت، وعلّقت على الموضوع بأن ده "الجواز عن طريق الفرن". أولا.. إنتي فعلا مابقتيش صغيّرة، وواضح إنك مش بتشتغلي ولا بتخرجي، وحياتك الاجتماعية فاضية تماما، يمكن علشان إنتي ساكنة في الصعيد، ويمكن ظروف كتير بتحكمك، لكن إنتي خلاص وصلتي لسن بقيتي امرأة كبيرة ومسئولة، صحيح لسه بنت، بس لو كنت اتجوّزتي كان زمان عندك أولاد كبار تاخدي بالك منهم.. لازم تخرجي للعالم، أنا رأيي تسيبك من الإنترنت؛ لأنه فيه خداع وكذب كتير، وكمان فعلا ممكن الناس يستغلّوا صورك أو يحاولوا يستغلوكي إنتي شخصيا. الأحسن إنك تعملي نشاط في المجتمع حواليكي؛ يعني مثلا لو كنتي مسلمة أو مسيحية روحي الجامع أو الكنيسة في وقت الصلاة وقابلي التجمّعات، خلّي الناس تشوفك واتكلّمي معاهم واتعرّفي عليهم، الستات بالتأكيد، ساعات الأمهات أو الأخوات يكونوا بيدوّروا لأخواتهم، انتهزي الفرصة وروحي اتسوّقي واشتري الحاجات، أنا ليّ صديقة والله مش باكذب عليكي قابلت جوزها حاليا أوّل مرة في سوبر ماركت جنب البيت. لو عندك جمعية خيرية قريّبة روحي هناك اعملي أنشطة واتعرّفي على الناس، اتطوّعي ودرّسي في فصول محو الأمية أو ساعدي المكفوفين، حتى لو فضلتي لوحدك وماحدش اتقدّم، هتبقي على الأقل مليتي حياتك واستفادتي بوقتك وعمرك اللي ربنا هيسألك عملتي بيه إيه. رأيي إنك لازم تتأكّدي من جدية الشخص تماما تماما، قبل ما تقرّري تبعتي له صورتك، والأفضل إنك تخرجي وتهتمّي بنفسك وتدّي إشارات إنك مش متجوزة في الأماكن اللي هتكوني فيها، وتتكلّمي مع الستات كتير، وتتعرّفي عليهم وتعملي علاقات اجتماعية ناجحة. كل ده هيساعدك صدّقيني، وربنا يكتب لك رجل ابن حلال يستاهلك ويخاف ربنا فيكي.
