اديني رأيك: بعد الجواز حياتي بقت مملة ورحت أدوّر على حب برة

السلام عليكم.. أنا مشكلتي مش عارف لها حل أنا متزوج من 15 سنة ولي طفلان ولد وبنت، تزوجت زواج تقليدي جواز صالونات وماكانش فيه حب بيننا بس في فترة الخطوبة كنت بحبها لأني كنت لسه شاب 24 سنة، وكنت زي أي شاب ملهوف على الزواج وبعد ما تزوجت بسنة حسيت إني اتسرعت في الزواج ومرت السنين وأنجبنا الطفلين.
المهم عشت حياة روتنية جدا زي أي اثنين متزوجين، قابلتنا مشاكل مادية كتير وكانت بتعدي، وفي آخر 4 سنوات اتعرفت على فتاة ولقيت فيه حاجة بتشدني ليها وحبيتها وهي كمان حبتني، بس أول ما اتعرفت على الفتاة كانت مجرد تسلية لأني لم أقل لها إني متزوج وكنت ناوي أسيبها بس كان طول الوقت فيه حاجة بتشدني لها..
بعدها مراتي عرفت إني باكلمها، اتصلت بيها وقالت لها ده بيضحك عليكي علشان هو متزوج وأنا مراته، طبعا علشان هي كده كشفت الحقيقة قلت لها إني متزوج بس كنت هاقول لك علشان أنا حبيتك وكان ضميري بيعذبني، قلت لها عندك استعداد تحبي واحد متزوج؟ قالت أنا حبيتك بجد ومش عارفة أنساك، ولا أنا عارف أنساها..
وكترت المشاكل مع زوجتي بسبب هذه الفتاة وأنا متعلق بها ومش هاعرف أسيبها، زهقت من زوجتي بسبب المشاكل وكنت بارتاح مع الثانية، لحد ما خطبتها ومراتي عرفت إني خطبتها وزادت المشاكل أكثر..
وفجأة تغيرت مراتي بس كان فات الأوان لأنها تغيرت في الوقت اللي حددنا فيه ميعاد الزواج، أنا دلوقتي محتار، هل أرجع لزوجتي وأطفالي وأفضح الثانية بعد أن تحدد ميعاد الزواج وعملت كتير معايا وساعدتني في تأسيس الشقة، ودلوقتي لم يعد أيام كثيرة على الزواج بعد أن رتبت كل شيء؟
أرجوك اديني رأيك..

Medo zizo


لو عايز تفضفض لنا دوس هنا