مؤلف "على جثتي": نعم فيلمي مقتبس من Just Like Heaven

اعترف السيناريست تامر إبراهيم مؤلف فيلم "على جثتي"، بطولة أحمد حلمي وغادة عادل، باقتباس فيلمه من الفيلم الأجنبي Just Like Heaven بطولة ريس ويزرسبون، ومارك روفالو، إنتاج عام 2006.
وكتب تامر إبراهيم على حسابه الشخصي بموقع التواصل الاجتماعي فيسبوك: "ردا على السؤال الشائع هو الفيلم مسروق من Just like Heaven فأظن الكلمة الأدق هي (مستوحى من..) لو مسروق كنت هاكتب فيلم عن واحدة خايفة تدخل قصة حب، لكنها لما اتحوّلت لشبح حبت اللي جه يأجر شقتها، ولما صحيت في الآخر عاشت معاه في سعادة.. أنا مش ضد الاقتباس بصورة عامة، وسكورسيزي نفسه خد أول أوسكار في حياته على فيلم مقتبس، وعمري ما أنكرت إني استوحيت فيلمي من Just like heaven وكنت كاتب كده على السيناريو كمان".
وأضاف تامر: "اللي عجبهم الفيلم أشكرهم وأقول لهم الحمد لله إنه عجبكم، واللي ماعجبهمش أقول لهم أوعدكم هاعمل كل اللي أقدر عليه عشان الجاي يكون أحسن، وما أكررش فيه أي غلطة من الغلطات اللي غلطتها المرة دي، واللي بيقروا لي من زمان أعتقد فاكرين أول رواية ليّ "300 دقيقة" بالفضايح اللي كانت فيها، لكن أعتقد إني اتعلّمت بعدها كتير وده اللي هاعمله في مجال السيناريو، زي ما عملت في الروايات.. شكرا لكل اللي كتب رأيه وهايكتبه خلال الأيام اللي جاية".
واختتم تامر كلامه قائلا: "عايز أشكر كل اللي شافوا فيلم "على جثتي" وقالوا رأيهم فيه سواء بالسلب أو الإيجاب.. فيه ناس حبّت الفيلم وبشدة، وناس كرهته وبشدة، والاتنين ليهم فائق احترامي.. ده أول فيلم ليّ، واتعلّمت من التجربة دي كتير وباتعلم حاليا من كل واحد كتب نقد عليه أو قال ملاحظة بخصوص السيناريو؛ مش عيب أغلط في أول تجربة لكن العيب أكرر الغلطات دي في اللي جاي، وعشان كده لازم أشكر كل اللي قال رأيه في الفيلم مهما كان".
"على جثتي" بطولة أحمد حلمي، غادة عادل، حسن حسني، آيتن عامر، وإخراج محمد بكير.