كشك بالأرز وقطع الفراخ على "سفرة دايمة"

الكشك من الأكلات اللي بتتعمل بأكتر من طريقة، وكل طريقة لها طعمها الخاص المميز، النهارده هنعمل مع بعض طبق الكشك بالأرز والفراخ..
كشك بالأرز وقطع الفراخ
المقادير:
1⁄2 كيلو صدور فراخ مسلوقة ومقطعة
3 ملعقة كبيرة أرز مغسول ومصفّى
بصلة مقطّعة شرائح
2 ملعقة كبيرة دقيق
2 كوب شوربة فراخ
ملعقة كبيرة زبدة
11⁄2 كوب زبادي
1⁄2 كوب لبن
عصير ليمونة
الطريقة:
1- اخلطي الزبادي مع الدقيق كويس أوي باستخدام المضرب اليدوي، وبعد كده ضيفي عليهم اللبن تدريجيا مع الاستمرار في التقليب، وفي الآخر ضيفي عصير الليمون وقلّبيهم مع بعض كويس، وسيبيهم على جنب علشان يختمروا.
2- هاتي طاسة، وشوّحي فيها البصل مع الزبدة، لغاية ما البصلة يبقى لونها بني، وبعد كده شيلي نصف كمية البصل من الحلة وسيبيهم على جنب لتزيين أطباق الكشك.
3- اغلي الشوربة في حلة على النار، وبعد كده ضيفي عليها الأرز، وغطّي الحلة وسيبيهم مع بعض على نار متوسطة لغاية ما الأرز يستوي، وبعد كده ضيفي عليهم خليط الدقيق بالتدريج مع التقليب المستمر على نار هادية علشان الخليط يتماسك ويبقى قوامه مناسب، ولو حسّيتي إنه خفيف ممكن تدوّبي شوية دقيق في كمية صغيرة من اللبن وتضيفيهم على الكشك مع الاستمرار في التقليب.
4- بعد كده ضيفي نصف كمية البصل اللي موجودة في الطاسة وقطع الفراخ المسلوقة، وقّلبيهم مع بعض على النار، وسيبيهم شوية على نار هادية، واتأكدي إن الطعم مظبوط، وممكن تضيفي شوية ملح على حسب رغبتك.
5- اغرفي الكشك في أطباق التقديم وسيبيه شوية علشان يتماسك، وبعد كده زيّنيه بالبصل اللي إنتي مجهزاه، ولو مش بتحبّي البصل المحمر، ممكن تزيّنيه بالبقدونس المفروم، وقدّميه.. وبالهنا والشفا.
خلصت وصفتنا النهارده..
استنونا كل يوم مع أكلات جديدة..
سلام،،،