عاوز التعامل إنجليزي.. كده يبقى راجل ولا عيّل؟

السلام عليكم ورحمة الله وبركاته، أنا حكايتي باختصار إن أنا وأسرتي عايشين في القاهرة وليّ عم عايش في الإسكندرية، وعلشان المسافات عمري ما شفت أولاده ولا هما شافوني، وفي الصيف ده حصلت مناسبة كانت خطوبة أختي واتعرّفت على أولاد عمي.
وابن عمي من نفس سني بس في الدراسة هيخلص بعدي بسنة، علشان هو سقط سنة، مع العلم إن أنا في كلية هندسة وهو في حقوق، هو قال لي إنه معجب بيّ وهيتقدم لي أول لما يخلص ويسافر ويشتغل، وبعدين في يوم قال لي عايز أشوفك فوافقت بعد أما استأذنت ماما.
وبعدين لما جه يتفق معايا على المكان اللي هنروحه سألني عن المكان المناسب لأنه من إسكندرية ومايعرفش حاجة في القاهرة، وبعدين هو قال لي نروح دريم بارك فقلت له مش عارفة اللي يعجبك، فقال ليه هو إنتي مفلّسة؟ أنا بصراحة سمعت الكلمة دي واتصدمت، يا ريت تقولوا لي، هو مش المفروض إن لما ولد بيخرج مع بنت ومش أي بنت دي بنت هتبقى خطيبته هو اللي بيخرّجها؟ يعني مايبقاش مستني منها إنها هي اللي تدفع ثمن التذكرة!
أنا مش عارفة تفكيري صح ولا غلط، مع إن واحدة صاحبتي بتقول لي ده عادي علشان هو لسه طالب وبياخد مصروف زيه زيك، يا ريت تقولوا لي رأيكم إيه لأن رأيكم ده هيفرق كتير معايا، لو سمحتم ماتتأخروش في الرد لأن أنا باكلمكم وأنا باعيط دلوقتي.

Semo


أهلا بكِ صديقة "بص وطل" العزيزة، وفي البداية بس عايزينك تهدأي وتعرفي إن الموضوع مش مستاهل عياط ولا حاجة.
أنا معاكي في تفكيرك ورأيك إن "الراجل" لما بيحب واحدة المفروض إنه يصرف عليها، أولا لإن ده الطبيعي وتأكيد لرجولته، وثانيا علشان يبين لها حبه وإنه مش بخيل عليها، وثالثا وده الأهم يأكد لها ولنفسه إنه بقى "مسئول" عنها ماديا ومعنويا و"عائل" ليها، ومن أول مظاهر هذه المسئولية والإعالة إنه يصرف عليها.
لكن من الناحية الواقعية البحتة ابن عمك لسه "عيّل"، وقبل ما تفهميني غلط عايزة أقول لك إن كلمة عيّل دي مش كلمة سيئة، لكنها تطلق على كل من يعوله شخص آخر، ودي حقيقة ابن عمك، فهو فعلا لسه معتمد على والده وبياخد مصروفه منه فهو إذن لا يزال "عيّل"، يعني حتى مش مسئول عن نفسه، فطبعا مش ممكن يكون مسئول عن غيره كمان.
وعلى هذا الأساس صعب قوي نحكم عليه دلوقتي، ونعرف هل موقفه ده وكونه عايزك إنتي اللي تدفعي ثمن التذكرة يدل على بخل مثلا ولا عدم حب ليكي ولا رغبة في استغلالك مثلا ولا إيه.
لذلك الحل الوحيد المتاح قدامك دلوقتي هو إنك تستني شوية لحد لما ابن عمك يتحوّل من "عيّل" إلى "عائل" لنفسه الأول، وبعدين نقدر نشوف هل هتكون عنده الرغبة في إنه يعول حد تاني ويتحمل مسئولية بيت وأسرة وأولاد ليهم طلبات معنوية ومادية، ومع الرغبة دي هل هتتوفر ليه القدرة على كده ولا لأ.
يعني تستني لحد لما يخلّص دراسة وجيش ويلاقي شغل ويقدر يصرف على نفسه، وتتوقفي عن الخروج معاه تماما لوحدكم، حتى لو كان ده بمعرفة والدتك، اللي بصراحة مش قادرة أفهم إزاي وافقت على هذا الموقف، وهل قلتِ لها على اللي بينك وبين ابن عمك ولا لأ؟
لكن على العموم منع المقابلات والخروج معاه لازم يكون نابع منك إنتي، وعن اقتناع إن ده الصح واللي في مصلحتك، وعلشان لا تظلميه ولا تظلمي كمان نفسك مع حد لسه "عيّل".

لو عايز تفضفض لنا دوس هنا