كيكة التفاح على "سفرة دايمة"

النهارده هنعمل مع بعض كيكة حلوة أوي وهي كيكة التفاح، علشان تقدّميها لعيلتك على الفطار أو تعمليها لضيوفك مع الشاي..
كيكة التفاح
المقادير:
6 ثمرة تفاح
ملعقة كبيرة قرفة
5 ملعقة كبيرة سكر
2 3/4 كوب دقيق
ملعقة كبيرة بيكينج بودر
1⁄4 كوب عصير برتقال
ملعقة صغيرة ملح
2 كوب سكر
كوب زيت
4 بيضات
فانيليا
الطريقة:
1- اغسلي التفاح كويس، وقشّريه وقطّعيه قطع صغيرة جدا.
2- اخلطي التفاح مع القرفة والسكر في طبق غويط، وغطّيهم وسيبيهم على جنب.
3- اخلطي الدقيق والبيكينج بودر والملح في طبق تاني.
4- في طبق تاني اخلطي الزيت مع عصير البرتقال والسكر والفانيليا، وبعد كده ضيفي الخليط ده على خليط المكونات الجافة، وقلّبيهم مع بعض وبعد كده ضيفي عليهم البيض واحدة واحدة مع تقليب الخليط كويس في كل مرة.
5- هاتي الصينية اللي هتعملي فيه الكيكة، وادهنيها بطبقة خفيفة من الزيت أو السمنة، ورشّي عليها طبقة خفيفة من الدقيق، وبعد كده صبي فيها نصف كمية العجينة اللي عملتيها، وبعد كده حطّي طبقة من خليط التفاح ، وبعدين حطّي باقي كمية العجينة وفي الآخر ضيفي باقي التفاح وساوي سطح الكيكة كويس.
6- دخّلي الصينية في فرن ساخن، وسيبيها لغاية ما الكيكة تستوي، وممكن تتأكدي إنها استوت بإنك تغرسي فيها سكينة أو خلة أسنان ولو طلعت نضيفة تبقى الكيكة استوت، وبعد كده طلّعيها من الفرن وسيبيها تهدى شوية وقطّعيها شرائح، وقدّميها.. وبالهنا والشفا.

وبكده تكون خلصت وصفتنا النهارده..
ماتنسيش تبعتي لنا كل الوصفات
اللي عايزة تعرفيها على "سفرة دايمة"..
سلام،،،