9 خطوات سريعة لنظافة بيتك في العيد

آية خالد
النهارده وبمناسبة إن العيد خلاص على الأبواب، هنقدّم لكل ست بيت خطوات سريعة وعملية علشان بيتك يستقبل العيد بنظافة ولمعان وروائح عطرية جميلة..
1- انعشي الأثاث بريحة الورد، بإنك تحطّي فوطة تلميع الأثاث في علبة صغيرة فيها كوباية مية مضاف عليها ملعقة ماء ورد، وعند الاستخدام اعصريها كويس أوي ولمعي بيها، وبكده ريحة الورد هتثبت في الخشب، وهتخلي البيت ريحته حلوة جدا.
2- اعملي معطر للمطبخ بإنك تغلي قشور التفاح أو البرتقال مع كوباية مية وعود قرفة ورشة فانيليا، ولما الخليط ده يغلي حطّيه في طبق، وارفعيه فوق التلاجة أو في أي مكان عالي، هيخلي ريحة مطبخك جميلة ودافية.
3- علشان تنضفي الفرن الكهربي والميكروويف من بقايا الأكل المتطاير، حطّي كوباية مية معصور عليها ليمونتين، وسخنيهم في الفرن أو المايكرويف لمدة 5 دقايق، وبعد كده امسحي الجدران الداخلية بفوطة قطنية.
4- ضيفي ملعقة نشادر أثناء غسيل الستاير، لأنها بتحميها من الكرمشة وبتخلّي لونها لامع ونقي، والغي خاصية العصر لو موجودة في غسالتك، لأن عصر الستاير بيخلّيها تتكرمش جدا وتفقد كتير من جمالها.
5- إذا كانت الحوائط عندك متغطية بورق حائط نظّفيها من التراب بفوطة أو قطعة إسفنج ناشفة، لأن المية ممكن تغيّر ألوانها وتخليها باهتة.
6- لما تيجي تنظّفي السجاد حاولي تقللي من التنفيض الجامد، لأنه ممكن يؤثر على خيوطه ويضيع رونقه، والأفضل إنك ماتخليهوش في الشمس لمدة طويلة لأنها ممكن تخلي الألوان باهتة، وممكن تكتفي بإنك تنظّفي السجادة بإسفنجة مبلولة بمية وخل، وده أفضل من غسيلها بالفرشاة والصابون.
7- عند تنظيف الثلاجة ما تستخدميش أي أدوات حادة علشان تشيلي البقع الملتصقة فيها أو قطع التلج، الأفضل إنك تفصليها من الكهرباء، وتستني لما الثلج يسيح خالص، وبعد كده نظّفيها بإسفنجة مبلولة بمية مذوّب فيها بيكربونات صوديوم، وبعد كده نشّفيها بقطعة قماش قطنية واستني ساعتين قبل ما توصّليها بالكهرباء وتشغّليها مرة تانية.
8- ممكن تنضفي شعلات البوتاجاز بإنك تحطّيها في حلة كبيرة، وتغليها مع شرايح ليمون (ليمونتين أو تلاتة)، وتسيبيها على النار لمدة نصف ساعة بعد كده اشطفيها واستخدميها.
9- لتنظيف الأسطح الزجاجية، امسحيها بقطعة قماش قطنية مبللة بماء مضاف إليه بعض الخل، وبعد كده امسحيه بأي قطعة قماش جينز ناشفة.‏
وبكده تكون خلصت نصايحنا ليكي النهارده..
جرّبيها ومستنيين رأيك فيها..
وكل سنة وإنتي طيبة..