لازانيا بالباذنجان المقادير: كيلو باذنجان علبة مكرونة لازانيا مسلوقة 3 ملعقة كبيرة زيت زيتون كوب زيتون مقطّع شرائح ملعقة صغيرة كزبرة ناعمة كوب جبنة موتزاريلا روزماري وزعتر وريحان 6 ثمرة طماطم مفرومة كوب جبنة شيدر ملح وفلفل مقادير البشاميل: 6 ملعقة كبيرة زبدة 4 كوب لبن كوب دقيق الطريقة: 1- قطّعي الباذنجان لمكعبات، وحطّي عليه شوية ملح وسيبيه شوية علشان ينزّل الميه اللي فيه، وبعد كده اشطفي قطع الباذنجان، ورشّي عليها قليل من زيت الزيتون، وحطّيهم في صننية في الفرن. 2- بعد ما الباذنجان يستوي، ضيفي عليه الطماطم المفرومة وشرائح الزيتون والملح والكزبرة والريحان والروزماري وكمية صغيرة من الجبنة الشيدر والموتزاريلا. 3- بعد كده ابدئي في تحضير البشاميل، بإنك تحطّي الزبدة على النار، وبعد كده ضيفي عليها الدقيق، وقلّبيهم مع بعض كويس على النار لغاية ما الدقيق يتحمص شوية ويبقى لونه دهبي، وبعد كده ضيفي اللبن وشوية ملح، عند الغلي يضاف الروزماري. 4- هاتي الصينية اللي هتعملي فيها اللازانيا، وحطّي من تحت طبقة خفيفة من البشاميل، وبعد كده ابدئي رصّي شرائح اللازانيا، وحطّي عليها طبقة من البشاميل، وبعد كده طبقة من الباذنجان، وفي الآخر حطي طبقة تانية من اللازانيا، وكرري نفس الترتيب من 3 ل4 مرات علشان تعملي كذا طبقة فوق بعضها، وفي الآخر حطّي الجبنة الشيدر والجبنة الموتزاريلا، ودخّلي الصينية في الفرن على درجة حرارة متوسطة وسيبيها لمدة من 30 ل45 دقيقة أو لغاية ما الوش يبقى لونه دهبي، وبعد كده طلّعيها وقطّعيها وحطّيها في طبق التقديم.. وبالهنا والشفا.
خلصت وصفتنا النهارده.. استنونا مع وصفات جديدة كل يوم.. سلام،،،