كلام يفطر.. بتقول مرسي ماعرفوش فرد عليها: إنتي مش متربية

سارة الإبياري
باحاول من أول رمضان كعادتي بقالي 3 رمضانات إني ماتفرجش على التليفزيون خالص.. علشان مافقدش صيامي..
بس اللي حصل امبارح إني اتفرجت؛ علشان أعرف أخبار الدنيا بيحصل فيها إيه.. لكن ده كان هيخليني أفقد رمضان كله.. اللهم إني صائمة..
وأنا باشوف أخبار الدنيا من حوالينا، لقيت عنوان غريب بيقول: "خالد عبد الله لهالة فاخر: إنتي مش متربية".. فقلت إزاي شيخ وعلى قناة دينية يقول كده.. اللهم إني صائمة..
استفزني الخبر.. وفتحت الفيديو المصاحب ليه، واتفرجت عليه على غير العادة.. وإذا بي ألاقي كم من الكلام ورا بعضه وشتايم وتريقة واستهزاء من قِبل الشيخ خالد عبد الله.. وبعدين جه تقرير فيه حوار لمجدي الجلاد مع هالة فاخر هما الاتنين بيتريقوا على مرسي شوية، وعلى النائب اللي أذن في البرلمان شوية.. وختموها بشفيق اللي قالت عليه هالة: "حبيييييبي".. واللهم إني صائمة..
بقى هالة فاخر تقول على رئيس الجمهورية محمد مرسي "هاهاها.. مين ده أنا ماعرفهوش؟؟".. طب أرد وأقول إيه.. اللهم إني صائمة..
يقوم الشيخ على القناة الدينية يقولها: "هتعرفيه غصب عن اللي..".. "وإنتي مش متربية".. طب أرد على كلام الشيخ وأقول إيه.. اللهم إني صائمة..
وبقيت محتارة أرد إزاي على مجدي الجلاد وهالة فاخر اللي قاعدين يتريقوا بأسلوب غير لائق على رئيس الجمهورية.. ولا إزاي أرد على الشيخ اللي بدل ما ينصحهم قعد يشتم فيهم.. أرد على كل دول (الجلاد - هالة - عبد الله) وأقول إيه.. اللهم إني صائمة..
ندمت إني اتفرجت على الفيديو وفتحت الأخبار من الأصل في رمضان..
اللهم إني صائمة..
اللهم إني صائمة..
اللهم إني صائمة..


إضغط لمشاهدة الفيديو: