كلام يفطر.. قال إيه: اللي جايب 98% في الثانوية ميلحقش كلية الطب

هناك من التصريحات والأحداث ما يدفعك إلى أن تُجن أو أن تصيح بأعلى صوتك "آه يا ولاد ال ..."، وتنهال بكلام يخرجك عن شعورك، وفي الشهر الكريم يخرجك من صيامك.
"بعبع الثانوية العامة" هكذا أصبح الكثيرون يصفون الثانوية العامة التي إما أن تحقق أحلام طلابها أو أن تدمر أحلامهم.
بالأمس ظهرت نتيجة تنسيق المرحلة الأولى للثانوية العامة... النتيجة التي خيبت آمال الكثيرين حيث لأول لمرة منذ أكثر من 10 أعوام تقريبا مجموع كلية الطب البشري يصل إلى 100%...!
نعم إنها الحقيقة...!.
امسك نفسك يا أخي ولا تنسَ أنك في رمضان.. صبّر نفسك وقل اللهم إني صائم.
يعني إيه الطالب اللي جايب 98% في الثانوية العامة يعتبر "فاشل" لأنه مدخلش كلية الطب بعد سهره الليالي وسهر أسرته معاه عشان يدخل الكلية اللي نفسه فيها...؟
طيب فين المسئولين عشان يفسروا لنا الموضوع دا...؟
وحتى اللي جايب 97% في مجموعة "علمي علوم" مش هيدخل لا كلية طب ولا صيدلة ولا حتى علاج طبيعي..
نفسي حد يفسرلي دا معناه إيه؟.
هل دا معناه أن الطالب لازم يدخل كليات "خاصة" عشان يحقق حلمه ويدخل الكلية اللي بيتمناها ودا طبعا "بالفلوس"؟.
طيب دا بالنسبة للقادر على كده.. بالنسبة للأسر اللي متقدر تدخل أولادها كليات خاصة يعملوا إيه...!؟
وهل دا معناه "شهادة وفاة" للكليات الحكومية خلاص.. وفي اتجاه عام لتشجيع الكليات الخاصة؟ ولا إيه!؟
أرجوك يا شيخ تبلع الكلام اللي هيخرجك من الصيام واوعوا حد فيكم يقول كلام يفطّر.. فقط قل اللهم إني صائم..

اللهم إني صائمة

اللهم إني صائمة