بالفيديو.. محجبات آخر شياكة مع جيلان عاطف

لكل بنت محجبة عايزة تظهر بكامل شياكتها وأناقتها وتحافظ على وقار حجابها، تابعي معانا نصايح خبيرة التجميل والاستايلست جيلان عاطف؛ علشان تعرفي إيه هي آخر موضة في الألوان والموديلات وكمان لفات الطرح، وإزاي تنسّقي الألوان مع بعضها...
الموديل الأول
الموديل عبارة عن كارديجان، وفيه حلقة معدن بيتربط بيها على قدام أو على ورا، وميزته إنك ممكن تلبسيه بكذا طريقة، ومعاه سروال لونه بيج.
الموديل ده بسيط جدا، وهيليق على البنت اللي عايزة تحدّد منطقة الوسط، وممكن تلبّسي طقم زي ده في فترة الصبح أو بعد الظهر، وأنا اخترت معاه شنطة كبيرة.
ميزة الموديلات السنة دي إن كلها بسيطة، وفيها نسبة قطن علشان تتناسب مع درجات الحرارة العالية اللي موجودة في مصر حاليا.
أما ربطة الطرحة فهي بسيطة ومربوطة على قدام، وفيها حركة من الجنب، وميزة الربطة دي إنها بتليق على أي وش.
الموديل الثاني
الموديل الثاني اللي معانا دلوقتي عبارة عن بادي وجوب بنطلون باللون الأصفر، وهو موضة جدا؛ لكن زي ما قلنا قبل كده فيه ناس كتير بتخاف تلبسه؛ لكنه لون فاتح وحلو أوي في الصيف، واخترت عليه كارديجان لونه برتقالي، وأنا بحب اللون ده؛ لأنه بيدي ضي للبشرة الخمرية أو السمراء وبالذات الدرجات المكتومة منه.
وعلشان نكسر حِدّة الألوان دي مع بعضها، اخترت معاهم حزام لونه جملي، وإكسسوارات عبارة عن عقد أصفر ومعاه واحد تاني تايجر، والإيشارب ستان مربع على ومربوط على ورا.
الموديل ده ممكن تلبسيه وإنتي خارجة الصبح أو بعد الظهر، وميزة الحزام ده إنه بيداري عيوب الجسم، ولو جسمك رفيع ممكن تلبسي الحزام لفوق شوية.

الموديل الثالث
اللون الأسود هو ملك الأناقة ولا غنى عنه في دولاب أي بنت أو سيدة، والموديل اللي معانا النهارده عبارة عن فستان لونه أسود، وله وصلة طويلة علشان يتربط بأكتر من طريقة.
الموديل ده مناسب لفترة بعد الظهر وممكن للمناسبات، ميزته إنه ممكن تربطيه بطرق مختلفة؛ علشان يداري عيوب الجسم على حسب طريقة الربطة بتاعته.
واخترت عليه إيشارب ستان تايجر لونه أبيض في أسود في رمادي.
إضغط لمشاهدة الفيديو:
وبكده تكون خلصت حلقتنا النهارده..
استنونا الأسبوع الجاي مع حلقة جديدة..