غيّري ستايلك مع خبيرة التجميل جيلان عاطف

لكل بنت محجبة عايزة تظهر بكامل شياكتها وأناقتها وتحافظ على وقار حجابها، تابعي معانا نصايح خبيرة التجميل والاستايلست جيلان عاطف، علشان تعرفي إيه هي آخر موضة في الألوان والموديلات وكمان لفات الطرح، وإزاي تنسّقي الألوان مع بعضها...
الأخضر مع البني.. وفستان يليق على كل الأجسام
سيدات كتير بيخافوا من لبس الفساتين لأنهم بيفتكروا إنه بيظهر الجسم ممتلئ، لكن أول موديل معانا النهارده هيليق على أي جسم سواء مليان أو رفيع، وميزة الفستان ده إن وسطه ساقط يعني مناسب جدا لو وسطك مليان، واخترت عليه كارديجان أخضر لأن الألوان الفوسفورية طالعة موضة السنة دي، مايلة إلى الفسفوري ولو بسيطة منها بيكون شكله لطيف.
ولو جسمك رفيع يبقى ممكن تستغني عن الكارديجان خالص، ومع الموديل ده أنا اخترت الإيشارب المشجّر لأنه بيدّي شكل أو قيمة حتى لو من غير لمعة، وطبعا الإكسسوار مافيش غنى عنه مع أي موديل.
الأصفر.. وجرأة اختيار الألوان
فيه ناس كتير ممكن تخاف إنها تلبس اللون الأصفر، لكن أنا دايما باقول إننا لازم نجرّب كل الألوان؛ لأن كل لون وله درجاته المختلفة اللي بتليق على بشرة كل واحدة.
والموديل ده عبارة عن فستان درابية بكم طويل، وعليه كارديجان وشال على الكتف، وجيب سوداء، وعليه عقد بسيط وإيشارب مربع مربوط من ورا، واخترت معاه شنطة كبيرة من الأشكال اللي طالعة موضة السنة دي.
الأزرق والبرتقالي.. ومزج رائع للألوان
الموديل ده عبارة عن بادي وعليه كارديجان، وعليهم جيب بنطلون لونها أزرق مدّي على لون الجينز، والموديل داخل فيه اللون البرتقالي المكتوم اللي هو الطوبي، وعليه حزام جملي علشان نكسر اللون الأزرق والبرتقالي، وعليه عقد برتقالي من الحجارة.
واخترت للموديل ده شنطة برتقالي، وإيشارب من القطن وداخل فيه نسبة ستان.

إضغط لمشاهدة الفيديو:
وبكده تكون خلصت حلقتنا النهارده..
استنونا الأسبوع الجاي مع حلقة جديدة..