جمالك بالألوان مع "جيلان".. الأبيض والأسود ملوك الألوان الكلاسيك

أهلاً بكل أصدقائي..
بجد أنا سعيدة إني موجودة معاكم في "قمر 14"، وسعيدة بكل المشاركات اللي وصلتني منكم الفترة اللي فاتت..
وأتمنّى إني أفضل دايماً عند حسن ظنكم، وأقدّم لكم كل اللي يفيدكم..
النهارده هنشوف مع بعض استايل جديد ورقيق..
وهنتكلّم عنه بالتفصيل زي ما اتعوّدنا..
الأبيض والأسود.. موضة على طول
في الاستايل ده هنلاقي إن الموديل لابسة أبيض في أسود، واللونين دول من الألوان الكلاسيكية اللي مش بِتِبْطَل أبداً، وكمان بيليقوا على كل البنات والسيدات وكل الأعمار.
والموديل هنا لابسة سالوبت أبيض وتحته بادي، وعليه بوليرو أسود طويل، وهو طالع موضة جداً بمختلف ألوانه وأشكاله وفيه منه خامات مختلفة.
الإكسسوارات المناسبة مع الأبيض والأسود
الموديل هنا لابسة حزام ساقط ورفيّع، وده بيدي شكل حلو، وبالنسبة للعقد أنا حبيت إني أدخل لون تاني مع الأبيض والأسود، ومعظم الناس بيحبوا يدخلوا اللون الأحمر معاهم وطبعاً بيكون حلو جداً، بس أنا النهارده حبيت أجرّب لون مختلف، واخترت عقد باللون الفيروزي والعقد بأطوال مختلفة، وفيه ألوان تانية كتير ممكن تليق معاهم زي النبيتي والأصفر والأخضر.
وبالنسبة لإكسسوارات الإيد حبيت ألبسها أساور أبيض في أسود وكمان الخاتم من نفس ألوان الأساور، ولو إنتِ عايزة الأساور والخاتم يكون لونهم من نفس لون العقد ما فيش مشكلة.
الحذاء الروماني كله أنوثة
زي ما قلنا قبل كده إن الاستايل الروماني في الصنادل موضة جداً، والنهارده الموديل لابسة صندل روماني أسود وبكعب، واخترنا الشنطة باللون الأبيض، ونقدر كمان نلبس شنط بألوان تانية زي الأسود والفضي هيكون شكلهم شيك جداً.
وعلى فكرة الموديل ده بيداري عيوب كتيرة في الجسم، ولو كنتِ مليانة شوية ممكن تستبدلي اللون الأبيض باللون السكري أو البيج، وممكن تجيبي البوليرو الأسود يكون طويل شوية بحيث يداري أكبر جزء ممكن.

إضغط لمشاهدة الفيديو:
وفي النهاية احب اشكر كل الناس اللي ساعدوني علشان اقدر اقدم لكم كل الجديد في موضة صيف 2010:
ملابس: "منال فلاورز" - تليفون 0108255551
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583

وبكده تكون خلصت حلقتنا النهارده..
لكن كلامنا عن الموضة والجمال لسه ما خلصش..
واوعي تنسي تبعتي لنا رأيك في حلقة النهارده..
إلى اللقاء،،،،