جمالك بالألوان مع "جيلان".. البساطة أهم ما يُميّز صيف 2010

أهلاً بكل بنات "قمر 14"..
النهارده هنكمل مع بعض كلامنا عن موضة صيف 2010..
وهنشوف مع بعض أكتر من موديل وهنشرحه بالتفصيل..
وهنشرح إزاي نقدر نداري عيوب الجسم بطرق مختلفة..
تابعونا...
1- قميص أبيض وبنطلون جينز.. استايل مناسب للجامعة
الاستايل اللي هنشوفه دلوقتي مناسب لأي بنت رايحة الجامعة أو الشغل الصبح، وهو عبارة عن:
- بنطلون جينز بقصة السروال.. أكيد أي بنت عندها في دولابها بنطلون جينز؛ لأنه عملي جداً وما فيش بنت تقدر تستغنى عنه..
واستايل البنطلون اللي معانا النهارده قَصته مختلفة شوية؛ لأنه نازل على واسع، وكمان قماشته طريّة وناعمة ومش بتلتصق على الجسم، والقَصة دي بنسمّيها قصة "الشيرويل" (السروال)، واستايل البنطلون ده بيناسب أي بنت حتى لو مليانة؛ لأنه مش هيبيّن تخنها.
- قميص أبيض ب"فولونات" على الصدر.. الأبيض من أكتر الألوان اللي بتمشي جداً مع الجينز، والقميص اللي هنشوفه في الفيديو ده طويل، وكمان هنلاقي إنه من ورا أطول من قدام، وطبعاً ده هيكون مناسب جداً لأي بنت بتعاني من مشكلة الأرداف العريضة.
وتصميم القميص ده كان موجود في القرن الثامن عشر، زي التصميمات اللي كانت بتلبسها "ماري أنطوانيت" ورجع موضة تاني دلوقتي وبقوة.
- الغوايش الرفيّعة موضة.. زي ما قلنا قبل كده إن الإكسسوارات بتضيف جمال وشياكة للطقم اللي إحنا لابسينه، وزي ما هنشوف في الفيديو إننا مع الموديل ده اخترنا إكسسوارات بسيطة وتليق مع اللبس الكاجوال، فاكتفينا بعقد فضي، ومعاه مجموعة كبيرة من الغوايش أو البانجلز الرفيعة، ودي موضة جداً السنة دي بكل ألوانها سواء الفضي أو الذهبي أو الأوكسيديه، ومعاهم خاتم من العاج الأبيض شكله بسيط ومناسب جداً مع الجينز.
- صندل جينز وشنطة أبيض في بني.. طبعاً في فترة الجامعة بنكون محتاجين نلبس أحذية مريحة وعملية، علشان كده اخترنا صندل جينز من غير كعب، أما بالنسبة للشنطة فمش لازم نقيّد نفسنا بإننا نلبس شنطة بيضة أو جينز، لكن حبيت إننا ندخّل فيها لون مختلف فاخترت شنطة لونها أبيض وداخل معاها درجة من درجات البني، وهو اللون الجملي أو الهافان، والدرجة دي بتليق جداً مع الجينز.

إضغط لمشاهدة الفيديو:
2- تألّقي باللون الفوشيا.. في خروجاتك بعد الظهر
اللون الفوشيا موضة من فترة طويلة سواء صيف أو شتاء، وميزة اللون الفوشيا إنه بيليق مع البشرة الفاتحة أو البشرة الخمرية، وكمان بيليق على ألوان كتير زي البني والبيج والأبيض والأسود...
ودلوقتي تعالوا نتكلّم بالتفصيل عن الاستايل اللي هنشوفه مع بعض، واللي بيناسب خروجات فترة بعد الظهر:
- هنلاقي إن الموديل عبارة عن بلوزة فوشيا طويلة من الظهر، وقصيّرة من الأمام، ومعاها بنطلون بني واسع بقصات بسيطة جداً.
- القَصّات البسيطة والانسيابية اللي موجودة في الموديل ده بتكون مناسبة لأي بنت عندها امتلاء في جسمها؛ لأنها مش بتدي حجم، لكن بالعكس بترفّع جداً، وبتدينا شكل ممشوق ومتناسق، واوعي تفتكري إنك كل ما لبستي حاجات ضيقة كل ما هتباني أرفع.
- الحذاء زي ما هنشوف اخترناه باللون البني وفيه كروسات، أما الشنطة فاخترناها باللون الجملي، واللون ده بيمشي على حاجات كثيرة أوي، وهو من الألوان الأساسية اللي لازم تكون موجودة في دولابك، وما فيش أي مشكلة إنك تلبسي الحذاء بلون والشنطة بلون مختلف، لكن أهم حاجة إن كل الألوان تكون متناسقة مع بعضها.
- بالنسبة للإكسسوارات فأنا اخترت عُقد مش نفس ألوان الملابس، لكنه متناسق جداً، لأنه داخل فيه ألوان زي الموف والأزرق والأخضر والفوشيا واللبني، والألوان دي بتمشي مع الملابس الغامقة وبتنوّر مع اللون الفوشيا، وكمان استغلينا اللون الموف الموجود في العقد واختارنا إيشارب فيه لون موف علشان كل الألوان تبقى متناسقة مع بعضها.
والموديل ده بيليق على أي واحدة عندها أجناب أو مليانة؛ لأنه من ورا نازل على واسع ومش محدد الجسم خالص، ولو منطقة الوسط عندك مليانة، فممكن تستغني عن الحزام أو تلبسيه ساقط شوية لتحت.

إضغط لمشاهدة الفيديو:
وفي النهاية احب اشكر كل الناس اللي ساعدوني علشان اقدر اقدم لكم كل الجديد في موضة صيف 2010:
ملابس: "منال فلاورز" - تليفون 0108255551
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583

وبكده يكون خلص عددنا النهارده..
وتابعونا الأسبوع القادم علشان نكمّل كلامنا عن موضة صيف 2010
فانتظرونا،،،،