جمالك بالألوان مع جيلان.. تألّقي في رمضان بموديلات شرقية

أهلاً بكل بنات قمر 14..
النهارده أنا معاكم في حلقة جديدة من حلقات "جمالك بالألوان مع جيلان" وهنستعرض مع بعض مجموعة جديدة من الاستايلات المستوحاة من التراث المصري الشعبي، واللي ممكن نلبسها في رمضان على الفطار أو على السحور.
* فستان مطعم بنسيج "أخميم"
أول فستان هنشوفه النهارده داخل فيه نسيج "أخميم" ودخّلنا معاه الإيشارب والحزام والكوليه من الكشمير الصعيدي، أما بقى الشنطة فهي من نفس الاستايل ونفس الشغل علشان تليق مع الجو العام لأن مش هيليق مع الاستايل ده إننا نلبس شنطة جلد أو جينز.
والاستايل ده مريح جداً وعملي وكمان شكله جديد، ده غير إنه بيليق مع كل الأجسام سواء كان جسمك مليان أو رفيع.
وبالنسبة لربطة الطرحة؛ فإحنا استخدمنا إيشارب مربع مشغول بشراشيب عليها حلية وخرز، وربطنا الإيشارب على ورا بطريقة عادية جداً، والربطة دي -زي ما قلنا قبل كده- بتليق مع كل أشكال الوش.

إضغط لمشاهدة الفيديو:

* الحروف العربية لإضافة روح شرقية
الموديل ده كمان مختلف ومميز جداً، وهو عبارة عن سالوبت أسود فضفاض ودخّلنا عليها إضافات شرقية سواء في الإيشارب أو الحزام أو الكوليه؛ فهنلاقي إننا اخترنا حزام عريض عليه كتابة بالحروف العربية، والكوليه كمان عليه نفس الحروف وعليه "بروش" أوكسيديه.
وبالنسبة للطرحة، هي عبارة عن إيشارب ستان أبيض في أسود، وعليه نفس الطبعات العربية.
إضغط لمشاهدة الفيديو:

* فستان مطرّز بالإيتامين
الموديل ده عبارة عن عباية على شكل فستان فيه طبقات فوق بعضها، وعليه تطريز بالإيتامين الأخضر والأصفر والبرتقالي، والألوان دي بتبقى حلوة وظاهرة جداً مع اللون الأسود.
الفستان ده موديله بسيط وشيك جداً، وممكن لو أي واحدة عايزة تلبس حاجة مختلفة شوية عن العباية، تختار الاستايل ده.
بالنسبة لربطة الطرحة أنا دخّلت اللون الأصفر علشان نكسر شوية اللون الأسود اللي موجود في الفستان، وكمان جبت التطريز على قدام.

إضغط لمشاهدة الفيديو:

* طقم شيفون شيك ومميز
الموديل ده ممكن أي واحدة تلبسه لو خطوبتها أو كتب كتابها هيكون في رمضان بعد الفطار، أو لو كنا معزومين على سحور ومش عايزين نلبس عباية سوداء.
وهو عبارة عن توب شيفون وسروال شيفون، وعليهم تلبيسة رقيقة جداً بتتربط من قدام ومن الضهر، وعليها تطريز بسيط جداً.
وبالنسبة للإكسسوارات؛ فأنا اخترت حاجات بسيطة، عبارة عن سلاسل وأساور باللون الذهبي مع الأوف وايت، وزي ما قلنا قبل كده إن الأساور موضة جداً.
أما بقى بالنسبة لربطة الطرحة فأنا استخدمت طرحة الطقم نفسه ودخّلت معاها طرحة بنقشة التايجر، وطبعاً نقشة التايجر موضة طول الوقت وبيليق مع بشرتنا الخمرية، وممكن إننا ندخّله مع كل الألوان.

إضغط لمشاهدة الفيديو:
وفي النهاية أتمنى إن الموديلات اللي قدّمناها النهارده تكون عجبتكم، وأُحبّ أشكر كل الناس اللي ساعدوني علشان أقدر أقدّم لكم حلقة النهارده:
ملابس: ست الحسن - تليفون 0101438919، وعبايات منال - 0123336463
إيشاربات: محل scarfobia - تليفون 0105246632
إكسسوار: مدام مها - تليفون 0125671899 - 0126767583

وتابعوني في العدد اللي جاي...
علشان هيكون عندنا مفاجآت كتيرة لكل العرايس...
سلام،،،