جمالك بالألوان مع "جيلان".. الجينز مناسب في كل الأوقات

أهلاً بيكم في حلقة جديدة من حلقات "جمالك بالألوان مع جيلان"
وعايزة أشكركم على رسايلكم الجميلة اللي بعتوها ليّ طول الفترة اللي فاتت.. وأتمنّى إني أفضل دايماً عند حُسن ظنكم..
والنهارده هنشوف مع بعض موديل جديد ومختلف عن اللي قدّمناه في الحلقات اللي فاتت..
وهو عبارة عن فستان جينز بقصات بسيطة، وعلى فكرة الاستايل ده موضة جداً الصيف ده..
وخامة الجينز كمان موضة طول الوقت، وميزته إنك ممكن تلبسيه في أي وقت، والخامة اللي إحنا هنشوفها النهارده هي قطن وواخدة نفس نقشة الجينز.
وبالنسبة لشكل الفستان فهو كات ومجسّم من الوسط، ونازل على واسع وفيه درابيهات من الذيل، وكمان فيه حزام من ورا علشان تقدري توسعي الفستان وتضيقيه زي ما إنتِ عايزة.
والموديل ده بيدي شكل أنثوي للبنت، واستايل الفساتين بشكل عام بيناسب البنت اللي جسمها مليان شوية، وممكن إنها تلبس بدل البادي بوليرو يكون طويل شوية؛ عشان يغطي منطقة الضهر، وفيه دلوقتي استايلات مختلفة للفساتين بتليق على أشكال الأجسام المختلفة.
وبالنسبة للإكسسوار فهنلاقي إننا اخترنا عقد بسيط لونه فضي، وفيه أحجار لونها قريّب من لون الفستان، ومعاه الخاتم والأسورة من نفس اللون، وكمان الموديل لابسة خاتم أبيض من العاج وفيه فصوص، وكمان لابسة ساعة فضي كبيرة، وطبعاً الساعات الكبيرة موضة جداً، وممكن نلبسها مع ألوان مختلفة من الملابس، وممكن إنك تلبسي قطعة إكسسوار بلون واحد (أبيض أو أسود) وهتليق مع ألوان مختلفة من الملابس.
أما الحذاء فإحنا اخترناه بكعب عالي شوية؛ لأنه هيكون أشيك مع الفستان، وممكن تلبسي حذاء بدون كعب، لكن الكعب بيكون شيك أكتر وبيدي أنوثة، بس زي ما قلنا قبل كده إننا لازم نختار كعب مريح وما يكونش عالي أوي.
أما الشنطة فاخترناها باللون الأبيض، يعني مش لازم نقيد نفسنا بإننا نلبس شنطة جينز أو بيضة، يعني ممكن نلبس معاه شنطة كحلي أو هافان أو أي لون مناسب، ومش لازم كمان إن الشنطة تكون بنفس لون الحذاء.

إضغط لمشاهدة الفيديو:
وفي النهاية أحب أشكر كل الناس اللي ساعدوني علشان أقدر أقدّم لكم كل الجديد في موضة صيف 2010:
ملابس: "منال فلاورز" - تليفون 0108255551
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583

ولغاية هنا وخلصت حلقتنا النهارده..
وأتمنّى إنها تكون عجبتكم..
ويا ريت تتابعوني في الحلقات اللي جاية..
علشان هقدّم لكم طرق سهلة ومختلفة لربط الطرحة زي ما وعدتكم قبل كده..
فانتظروني،،،