جمالك بالألوان مع جيلان.. جددي مظهرك بلمسات بسيطة

وصلتني منكم أسئلة كتيرة في الفترة اللي فاتت بتسألوا فيها..
إزاي أقدر أغيّر من استايلي ومن شكل لبسي مع الحجاب؟! إزاي يبقى شكلنا متميّز وجديد دايماً؟!
والنهارده هحاول أساعدكم، وهنعرف مع بعض إزاي ممكن نغيّر من الاستايل بتاعنا بشوية إضافات وأفكار بسيطة جداً هنضيفها على ملابسنا...
تعالوا نشوف مع بعض...
* الشيميز مناسب أكتر مع الحجاب
الموديل اللي معانا النهارده لابسة شيميز لونه كافيه، والخامة بتاعته زي خامة البادي، وده ممكن يتلبس وعليه بوليرو كات أو مع السراويل، وممكن كمان تلبسيه لوحده؛ لأنه مش ضيّق على الجسم.

أما بقى بالنسبة للإكسسوارات؛ فالموضة دلوقتي هي الحاجات اللي عليها الكتابات العربية، وكمان القماش والخيوط موضة جداً في الإكسسوارات...
أما بقى بالنسبة لربطة الطرحة، فكل ما كانت بسيطة كل ما كانت أحلى وأشيك، وزي ما هنشوف في الفيديو فأنا استخدمت إيشاربين: واحد باللون الأسود، والتاني عليه نقشة التايجر بنفس ألوان الطقم، وهي ألوان الكافيه والبني والأسود، وأنا اخترت نقشة التايجر؛ لأن الطقم اللي الموديل لابساه سادة.

إضغط لمشاهدة الفيديو:

* التصميمات المصرية.. شكلها مميز وشيك
الطابع المصري أو الشرقي في موضة الملابس اللي داخل فيها نسيج أخميم والكتابات العربية، وكل الحاجات اللي بتبيّن هويتنا، وناس كتيرة بتحب اللبس ده، وكمان الخامات اللي بيتعمل منها بتكون لطيفة وخفيفة على الجسم..
دلوقتي هنشوف موديل فيه الطابع المصري، بس بطريقة جديدة ومبتكرة ومواكبة للموضة، وهو عبارة عن دريل وعليه بوليرو واسع علشان يداري منطقة الذراعات.
والدريل عليه حلية من فوق من نسيج أخميم، والدريل خامته قطن، وهو "مكشكش" من تحت بالأستيك، وممكن تلبسي من تحت بنطلون ضيق أو سروال، والموديل ده بيناسب كل الأجسام؛ لأنه بيداري عيوب الجسم.
أما الإكسسوار فهو عبارة عن عقد بسيط جداً من الجلد الأسود وعليه الخرز والعين الزرقاء، وكمان قطعة فضية عليها نقوشات عربية.
أما بالنسبة لربطة الطرحة فإحنا استخدمنا الإيشارب المربع، والإيشارب ده ميزته إنه بيكون سهل جداً في ربطه، وممكن أي واحدة تعمله لنفسها.

إضغط لمشاهدة الفيديو:
وفي النهاية أتمنّى إن الأفكار اللي قدّمناها النهارده تكون عجبتكم، وكمان أحب أشكر كل اللي ساعدوني علشان أقدّم لكم حلقة النهارده...
ملابس: ست الحسن - تليفون 0101438919، وريحانة - تليفون 0122808115
إيشاربات: محل scarfobia - تليفون 0105246632
إكسسوار: مدام مها - تليفون 0125671899 - 0126767583

واستنوني في العدد الجاي علشان نكمّل كلامنا...
وما تنسوش تبعتوا لي رأيكم وتعليقاتكم على حلقة النهارده..
سلام،،،