ادينا رأيك: باعني بعد ما كان بيقول إني الوحيدة اللي في قلبه

أنا عندي 19 سنة وكنت بحب ابن خالتي جدا وكان بيحبني جدا جدا.. الحكاية إنه كان في الأول بيحبني، وأنا ماكنتش حاسة بيه أوي، وكان كل لما يقول لي: "بحبك.. وماليش غيرك.. وإنتي الوحيدة اللي في قلبي" والكلام ده، وأنا بجد حبيته جدا جدا، وكنا متفقين على الجواز، وكان أهلي وأهله عارفين إن إحنا بنحب بعض؛ بس المشكلة إن كان بين والده ووالدي مشكلة؛ فكنا مأجلين حكاية إنه يتقدم ليّ لما يصفى الطرفين.

المهم إن فجأة اتصلت بيّ أخته وقالت لي أبعد عنه؛ لأن أمه تعبت بسبب الموضوع ده، والله أعلم ليه؟؟ فاتصلت بيه وقلت له على الكلام ده؛ فقال لي أشوف حالي لأن حكاية زواجنا لن تنفع، ولم أجد مبررا مقنعا لهذا الكلام؛ فاشتكيته لأصدقائي المقربين، وفيه من يقول إني أنساه كما نسيني، وفيه من يقول إني أقابله وأعاتبه.

ولكن أنا مستغربة إنه قال هذا الكلام.. أنا كنت متأكدة من إنه بيحبني بجد؛ لأنه كان ينتظرني بالساعات علشان يشوفني.

وأنا محتارة دلوقتي أعمل إيه؟؟!! أعاتبه.. ولا أنساه.. ولا أكلمه على إنه ابن خالتي وبس؟؟ ولا أرجع الكلام وأفهم إيه الحكاية؟!

ولكن قالت لي زميلتي إني لو فاتحته في هذا الموضوع باكون بارخص نفسي، وأحسسه إني متعذبة من غيره، وده مايستهلش إنه يعرف إني زعلت عليه؛ لأنه باعني.

وأنا آسفة على التطويل؛ ولكني تعبانة جدا من هذا الموضوع، وأريد حلا أقنع به نفسي علشان أرتاح.

Ahmed kap


لو عايز تفضفض لنا دوس هنا