لكل عروسة.. ماسك لتعطير وتنعيم الجسم مع رانيا

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده هنرد على بعض أسئلتكم، وهنقول نصايح سريعة وبسيطة لست البيت الشاطرة، وهنعمل ماسك للعروسة بالرز والأحجار العطرية لتنعيم وتعطير الجسم، بناء عل طلب كتير من أصدقائنا...
إزيك يا رانيا.. أنا معجبة جدا بكل اللي بتقدّميه، وعايزة أسأل: هل استخدام الليزر في إزالة الشعر آمن ولا ضار، وهل بيشيل الشعر فعلا؟
إزالة الشعر بالليزر عملية آمنة حتى الآن ولم يثبت لها أي أضرار جانبية، وهو بيشيل الشعر بنسبة 80% ومش بيطلع مرة تانية، لكن أهم حاجة إنك تختاري دكتور كويس وموثوق فيه.

هل لازم نضيف خل أو ليمون على كرات الحنة اللي عملتيها في حلقة قبل كده؟
ممكن ما تضيفيش الخل أو الليمون لو مش عايزة الحنة تعمل لون، وممكن تخلطيها مع شوية زيت زيتون، وممكن تعملي معاها خلطة الزيوت اللي قلنا عليها، وهي عبارة عن كميات متساوية من: زيت الجرجير وزيت الخروع وزيت اللوز الحلو وزيت جوز الهند وزيت الزيتون، وبتحفظيهم في برطمان زجاجي، ولما تيجي تستخدميهم بتخلطيهم مع كرة الحنة لغاية ما تدوب، وتوزّعي الخلطة دي على الجذور وباقي الشعر، وتسيبيه لمدة ساعتين أو تلاتة، وممكن تباتي به وتغسليه الصبح بالشامبو.
عايزة أعرف الفرق بين استخدامات زيت اللوز الحلو وزيت اللوز المر، وهل ينفع استخدام زيت اللوز الحلو بدل المر في وصفة اللبان الدكر لتفتيح البشرة؟
زيت اللوز الحلو بيستخدم على بشرة الوش والجسم والشعر، أما زيت اللوز المر بيستخدم فقط على بشرة الوش أو الجسم، وبالنسبة لوصفة اللبان الدكر؛ فالأساسي فيها هو زيت اللوز المر لتفتيح البشرة، علشان كده ماينفعش تستخدمي زيت اللوز الحلو في الوصفة دي.
هل زيت الأملج بيفرد الشعر فعلا؟
أنا مش بافضل الحاجات اللي بتفرد الشعر، ومش بحب أستخدم الأملج لفرد الشعر؛ لأنه مع ناس كتير بيجيب نتيجة مش حلوة، وفيه ناس كتير بتستخدمه مع الحنة علشان تفرد الشعر، لكنه بيجفف الشعر جدا، وبيخلّي الشعر مفرود ولكن مش الفرد اللي إنتي بتتمنّيه.

إضغط لمشاهدة الفيديو:
نصائح لست بيت شاطرة:
1- لمّا تيجي تنشري الملابس البيضاء ممكن تعلقيها على شماعة وتحطّيها على المنشر الداخلي في البيت؛ وده علشان المشابك ما تعلّمش على الملابس، وتفضلي محتفظة بشكلها جديد.
2- عند ترتيب الملابس في الدولاب، اهتمي دايما إنك تطبّقيها بنفس طريقة تطبيق المحلات، علشان يبقى دولابك دايما شكله شيك ومرتب، وحتى لو حسّيتي إن الموضوع صعب أو هياخد وقت، فصدّقيني مع الوقت هتلاقي إنه مش هياخد وقت منك، وهتحصلي في الآخر على شكل جميل ومرتب للدولاب، وما تنسيش تعطّري الدولاب بأي عطور عندك.
ماسك لتعطير وتنعيم الجسم
المقادير:
* 4 ملعقة كبيرة رز مصري مطحون
* حجر عطري برائحة البرتقال أو العود أو الفانيليا (هتلاقيه عند العطار)
الطريقة:
ابشري الحجر بالمبشرة من الناحية الناعمة، واخلطيه مع الرز المطحون، وبعد كده حطّيه في أي علبة بودرة قديمة عندك أو ملاحة، ورشّيه على جسمك كله بعد الحمام وهو مندّي بالمية، وطبعا ممكن تستخدميه على المناطق الحساسة، وسيبيه على جسمك لمدة ربع ساعة وبعد كده افركي جسمك، ومع الاستخدام هتحصلي على بشرة ناعمة ورايقة وريحتها حلوة جدا، والماسك ده ممكن تستخدميه بشكل يومي أو مرتين في الأسبوع.

إضغط لمشاهدة الفيديو:
وبكده تكون خلصت حلقتنا النهارده..
نتمنّى إنكم تستفيدوا منها وتجرّبوا الماسك اللي عملناه لتعطير الجسم..
وتبعتوا تقولوا لنا على النتيجة..
واستنونا في الحلقة الجاية وماسكات تانية كتيرة ومفيدة..
سلااااااام،،،