كرات الحنة وخل التفاح لتغذية الشعر

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، وفي حلقة النهارده هارد على بعض الأسئلة اللي وصلتني منكم، وهنعمل ماسك الحنة مع خل التفاح، وهنبدأ الحلقة بالرد على أسئلتكم...
1- هو زيت الأملا بيتعمل من نبات الأملج؟
فيه شجر اسمه شجر أملا، والزيت تم تسميته بهذا الاسم نسبة للشجرة دي، أما نبات الأملج هو بيستخدم مع الحنة لفرد الشعر، ولكن نتايجه مش مضمونة أوي؛ لأن مافيش حاجة طبيعية بتفرد الشعر، وأي حاجة بتستخدم لفرد الشعر لازم يكون فيها مواد كيميائية مضرة للشعر.
2- أنا ماعرفتش ألاقي سمنة جوز الهند اللي قلتي عليها، ولما طلبت مكعبات الشمع من عند العطار أعطاني حاجة لونها أبيض.. هو كده صح ولا غلط؟
سمنة جوز الهند دي بتتباع في علب وهي بتستخدم في الأكل وهي موجودة في السوبر ماركت الكبيرة، أما مكعبات الشمع اللي إحنا استخدمناها قبل كده بيبقى لونها أصفر مش أبيض.
3- فيه نبات اسمه "المر" كانوا بيستخدموه للحبوب اللي بتطلع في الوش وبيخلّيها تختفي وتغلق المسام.. هل الكام ده صحيح؟
الكلام ده صحيح.. وإن شاء الله في الحلقات اللي جاية هنستخدم نبات المر وزيت المر.
4- عايزة أعرف أستخدم مكعبات الشمع إزاي؟
مكعبات الشمع بنسيّحها على النار ونسيبها تهدى لمدة 3 ثواني، وبعد كده بنستخدمها على البشرة على طول.

5- أنا عملت بلسم وبيطلع خفيف مع إني باحط عليه ميه؟
لمّا تيجي تعملي البلسم لازم تستخدمي مية معدنية ومية بلسم، لكن مش بنستخدم مية الحنفية.

6- شعري بيقع من الجذور، ينفع أعمل ماسك الحنة باللبن الرايب ولا هيزوّد تساقطه؟
لا طبعا تقدري تعملي الماسك؛ لأن اللبن الرايب بيفيد الشعر، ولكن سقوط الشعر ليه ماسكات تانية قلناها في حلقات سابقة حاولي تداومي عليها وخصوصا الماسكات اللي فيها زيت الثوم وزيت جوز الهند وزيت الجرجير.
7- إيه هو زيت العطر الفاسي وإيه هي فوائده، وسمعت إن دم الغزال بيستخدم للجسم والبشرة والشعر؟
زيت العطر الفاسي زيت صحي جدا للجلد، وفوائده إنه بيعطّر الجسم جدا وبيغذّي البشرة، وممكن تستخدميه على بشرة وشك لكن بنسبة قليلة جدا.
ودم الغزال فعلا بيستخدم للجسم والبشرة والشعر، وممكن تخلطيه مع الحنة علشان تدّيكي لون أحمر.
8- أنا عايزة أعمل ماسك الحنة علشان أغذّي الشعر؛ بس من غير ما تعمل لون؟
علشان الحنة ماتدّيش لون ماتحطّيش عليها خل أبيض أو خل تفاح أو ليمون أو برتقال، والحنة بتغذّي الشعر جدا وهتدّي لشعرك لمعان وصحة بدون أي لون.
9- هل ممكن أضيف زيت الأملا الأصلي مع إضافة زيوت تانية عليه؟
زيت الأملا كويس جدا، وفيه شجرة اسمها "أملا" بيستخلص منها الزيت ده، وممكن نضيف عليه زيت جوز الهند وزيت لوز أو زيت زيتون ونخلطهم بنسب متساوية، وده هيغذّي الشعر جدا، وممكن نزوّد كمية زيت الأملا شوية عن باقى الزيوت.

إضغط لمشاهدة الفيديو:
ودلوقتي هنعمل ماسك كرات الحنة مع خل التفاح:
المقادير:
1 1⁄2 ملعقة كبيرة حنة
3 ملعقة خل تفاح
الطريقة:
هنخلط الحنة مع خل التفاح كويس، ونقلّبهم لغاية ما يتماسكوا ونقدر نعمل منهم كرات صغيرة، ونسيب الكرات دي تنشف لمدة يوم كامل، وعند الاستخدام هندوّبها في 3 ملاعق من خليط الزيوت اللي عملناه في حلقة قبل كده، وهو عبارة عن كميات متساوية من (زيت الجرجير + زيت الخروع + زيت الصبار + زيت الزيتون + زيت اللوز الحلو)، وبعد كده بنرج الزيت كويس مع الحنة، ونسيبها لمدة 2 : 3 ساعات لغاية ما تدوب كويس، وبعد كده نستخدمها على فروة الشعر، ونسيبها طول الليل مثلا والصبح نغسلها، والماسك ده بيغذّي الشعر جدا وبيقوّيه.

إضغط لمشاهدة الفيديو:
وبكده تكون خلصت حلقتنا النهارده..
نتمنّى إنكم تكونوا استفدتم منها..
وفي انتظار أسئلتكم وتعليقاتكم..