سؤال وجواب.. عن مشكلات البشرة والشعر مع رانيا

أعده للنشر: رحاب سليمان
أهلا وسهلا بكل بنات "قمر 14"، حلقتنا النهارده هنردّ فيها عن كل الأسئلة اللي بعتوها لنا، وإن شاء الله أقدر أردّ على كل أسئلتكم..
* أول سؤال عن زيت جوز الهند وزيت اللوز، ومواصفاته علشان نعرف هو كويس ولا لأ؟
زيت جوز الهند بيبقى لونه أبيض وعمره ما بيبقى شفاف، وفي الشتاء بيتجمد وبتبقى رائحة جوز الهند فيه قوية جدا، وأي مواصفات تانية غير دي يبقى الزيت مغشوش.
بالنسبة لزيت اللوز وزيت الورد ممكن تستعمليهم لوحدهم زي ما قلنا قبل كدة بإنك تجيبي أي زجاجة أو برطمان وتملي ربعه بس زيت ورد وتكملي الباقي بزيت لوز وبتستخدميه على جسمك بعد الشاور واللوشن ده بيطري وبينعم وبيدى ريحة حلوة للجسم.

* إيه فوائد صابونة لمبادا وأدورا؟
صابونة لمبادا أو أدورا بتستخدم للبشرة الدهنية أو المركبة، بس لو هتستعمليها الصبح ممكن بعدها تحطي لبن على بشرتك أو أي ماسك؛ لأنها بتنشف البشرة شوية، والصابونة دي بتنشف الحبوب وبتفتح البشرة.
ولو بشرتك جافة أو عادية يبقى مش هينفع تستخدميها بشكل يومي، أو ممكن تستخدميها مرتين بس في الأسبوع مع غسيل الشعر وزي ما قلنا بتحطي بعدها لبن الصبح وبالليل بتستخدمي الكريمات المرطبة، وبجد بتدي نتيجة هايلة أوي.
* عندي مشكلة نمو الشعر بسرعة بعد السويت.. أعمل إيه؟
زي ما قلنا فيه نبات اسمه نبات السعد بنحط منه بعد ما نعمل السويت من 4 : 5 أيام سواء مغلي في مية بس، وناخد المية بتاعته أو مخلوط مع فازلين وده بيأجل نمو الشعر بعد السويت.
* إيه رايك في سكرب كلين آند كلير للرؤوس السوداء؟
سكرب كلين آند كلير هو كويس، بس مع ناس كتيرة بيطلع لهم حبوب تحت الجلد، عايزة أقول لأي حد إنه يستخدم الحاجات الطبيعية بتاعتنا، ويقول لنا رأيه فيها إيه، وإن شاء الله هتجيب نتيجة أحلى بكتير للبشرة.
واللبن من الحاجات المهمة جدا لكل أنواع البشرة لما بنحطه الصبح كل يوم بيدي جمال للبشرة بشكل ملحوظ جدا.
وبالنسبة للبن مع العسل هو كويس للبشرة، بس ما نزودش نسبة العسل، ولو هنزودها يبقى مرتين بس في الأسبوع أو تلاتة بالكتير ويكون بعد الشاور علشان مسام الجسم تكون مفتوحة بعد تعرّضه لكمية كبيرة من البخار، لكن لو هتستخدميه كل يوم يبقى لبن بس من غير العسل.
* سؤال عن ماسك الطمي الطبيعى؟
الطمي الطبيعي ليه فوايد كتيرة أوي سواء اللي بيجي من الأردن أو المغرب؛ لأنه بيغذي البشرة وينشطها وبيمنع ظهور التجاعيد أو على الأقل بيأخر ظهورها، وكمان بيخلي البشرة تتنفس حلو أوي، وخاصة للناس اللي مش بتهتم ببشرتها، فده بيساعدها إنها تتنفس كويس أوي.
* إيه رأيك في حنة الفرد؟
مافيش حاجة اسمها حنة فرد، والمواد دي بتحرق الشعر وتسبب تساقطه، وفيه مادة جديدة بتستخدم لفرد الشعر حاليا وهي الكيراتين، لكن أنا شايفة إن كيراتين اللي بيستخدم لتغذية الشعر أفضل، لكن لو كيراتين فرد أنا مش بارحّب بيه خالص.
يعني أنا بافضّل إنك تروحي للكوافير مرتين أو ثلاثة في الأسبوع، وتعملي سيشوار أو مكواة عن إنك تعملي فرد؛ لأن الفرد بيدمر خلايا وجذور الشعر وكمان الشعر الجديد لما بيطلع بيبقى مجعد من فوق ومن تحت مفرود، وبيكون شكله مش لطيف أوي.
وأنا بأؤكد يا ريت بلاش فرد يعني ممكن نستخدم كريمات أو حاجات مغذية وده كمان هيخليكي تقدري تنوعي في شكل شعرك يعنى مرة كيرلي ومرة نص نص ومرة تخليه مفرود خالص.
* إيه رأيك في كريم كيناكومب للبشرة، وإيه أفضل طرق إزالة شعر الوجه؟
أنا مش باحبّذ إن الكريم ده يتحطّ على بشرة الوجه، وبالنسبة لإزالة الشعر في الوجه ممكن تعمليه بالفتلة أو بالشمع وممكن تشقّريه.

إضغط لمشاهدة الفيديو:

* هل فعلا زيت الخروع مفيد لتكثيف الحواجب؟
الزيت ده مفيد جدا لتتقيل شعر الحواجب وممكن تحطيه لوحده أو تخلطي معاه كريم مرطب، كمان أي كريم مرطب بتستخدميه لبشرة وشك ممكن تحطيه على حواجبك وهتلاقي نتيجة كويسة أوي.
وبالنسبة للحنة اللي بنستخدمها على الحواجب هي اسمها حنة صبغة وبتكون صبغة بس تحت بند الحنة، ودي ممكن تستخدميها علشان تحددي شكل الحواجب بس مش كتير، يعني ممكن كل 3 شهور تحطي من الحنة وتستمري في الخروع مع الكريم المرطب، وده على المدى البعيد هيجيب نتيجة كويسة أفضل من الحنة، وكمان بلاش تستخدمي قلم الحواجب لأنه معروف إنه بينحل شعر الحواجب.
* هل حمام الزيت بينشف الشعر ولا لأ؟
حمام الزيت لو استخدمناه بالطريقة الصحيحة مش بينشف الشعر خالص، لكن ما ينفعش نحط الزيت على شعر مش نضيف؛ لأنه طبعا مش هيجيب نتيجة؛ لأن مسام الرأس بتكون مقفولة والشعر مش نضيف، لكن لو استخدمناه بالطريقة الصحيحة هيجيب نتيجة كويسة والطريقة الصحيحة هي إنك تغسلي الشعر مرتين بالشامبو وبعدين تحطي حمام الزيت بداية من الجذور وبعد كده على باقي الشعر، وبتسيبيه مدة من ساعة لأربع ساعات حسب نوع الزيت اللي هتستعمليه وبعدين تغسلي الشعر مرة تانية بالشامبو.
أما بالنسبة للناس اللي بتدهن شعرها بعد الغسيل بكمية من الزيت ويسيبوه على الشعر لغاية الغسلة التانية، طبعا ده أنا مش بانصح بيه خالص؛ لأنه بينشّف الشعر وبيسبب تساقطه.
* إزاي أعالج تقصيف الشعر؟
بالنسبة للشعر التالف المقصّف من الأطراف فأفضل علاج ليه هو إنك تقصيه، وبعد كده تبدئي تعتني به، وتستخدمي له الحاجات اللي قلنا عليها في الحلقات اللي فاتت.
* هل الحنة بتنشف الشعر؟
بالنسبة للحنة فهي مفيدة جدا للشعر ومش بتنشفه لو استخدمناها بمرطبات زي ما قلنا، يعني ممكن تضيفي عليها خل تفاح أو خل أبيض مع زهرة الكاموميل، وعند الشطف ممكن تستخدمي حمام كريم أو بلسم، والحنة لو استخدمناها لوحدها ممكن تنشف الشعر بس مش بدرجة كبيرة لكن لو استخدمنا معاها زهرة الكاموميل هتجيب نتيجة هايلة جدا.

إضغط لمشاهدة الفيديو:

ولغاية هنا خلصت أسئلتكم وإجاباتنا..
استنونا الحلقة اللي جاية..علشان نكمل أسئلتكم والإجابة عليها..
تابعونا،،،

*********************
للرجوع للحلقات السابقة
اضغط هنا "جمالك من الطبيعة مع رانيا"
*********************