البشرة المختلطة هي خليط من البشرة الدهنية والبشرة الجافة مع بعض، وبتكثر الغدد الدهنية في مناطق معينة زي منطقة الذقن والجبهة والأنف، علشان كده بتلاقي إن البنات اللي بشرتها مختلطة دايماً بتشتكي من ظهور الحبوب والدهون في منطقة الذقن والجبهة والأنف.. إزاي تتعرفي عليها؟ لو كنتِ عايزة تعرفي إذا كانت بشرتك مختلطة ولا لأ؛ يبقى أول ما تصحى من النوم اغسلي وشك وبعدين استني ساعة، وجيبي ورق كلينكس وحطيه على كل وشك، لو لقيتِ إن البشرة عند منطقة الخد لم تطبع أي دهون على المنديل وإن في دهون على المنديل مكان الأنف والذقن والجبهة يبقى بشرتك مختلطة دهنية... ولو حسيتي إن بشرتك ناشفة شوية أو محمرة زيادة عن اللزوم ومنطقة الأنف والذقن والجبهة هي اللي بتلمع تبقى بشرتك مختلطة جافة. إزاي تعتني بيها لو كانت مختلطة دهنية؟ لو كانت بشرتك مختلطة دهنية يبقى المفروض إنك تمشي على النقاط دي.. 1. ابعدي عن الكريمات اللي فيها دهون أو زيوت. 2. احرصي إن يكون عندك كريمات مخصوصة للبشرة المختلطة الدهنية. 3. في الصباح اغسلي وشك بغسول جيل مناسب لنوع بشرتك، وعلى فكرة الغسول ده بينشف الوش وبيخليه خالي من الدهون بس اللي ما توصلش لدرجة الجفاف.. بعد كده استخدمي كريم خاص بالبشرة الدهنية المختلطة خالي من الدهون. 4. بالليل استخدمي مزيل الماكياج علشان يشيل أي أثر للماكياج خصوصاً من على العين، وبعدين الكريم المرطب الخالي من الدهون وعلى فكرة الكريم ده هو نفسه اللي بتستخدميه الصبح. 5. لو حصل لبشرتك أي تغيير مفاجئ مثل ظهور الحبوب في الجبهة أو الذقن؛ فده بيكون نتيجة عوامل نفسية أو اضطراب في المعدة أو توتر عصبي أو اقتراب ميعاد الدورة الشهرية أو نتيجة استخدام الماكياج بكثرة وعدم إعطاء البشرة فرصة لكي تتنفس.. وفي الوقت ده لابد إنك تغسلي وشك بصابون طبي وتوقفي استخدام الماكياج يومين على الأقل وتستخدمي المطهر بالليل وخاصة اللي زي المضاد الحيوي، وممكن تستخدمي الماسك الشفاف "بيل أوف" هتلاقيه موجود في الصيدليات وده بيتحط على الوش لمدة ربع ساعة، وممكن تغسلي وشك بالليل بصابون مطهر، وبعد كده الجلد هيتعافى بالتدريج وبعدين ممكن تستخدمي الكريمات العادية اللي كنتِ بتستخدميها قبل الحبوب.. وما تحاوليش إنك تلعبي في الحبوب دي نهائي. إزاي تعتني بيها لو كانت مختلطة جافة؟ البشرة بتكون دهنية عند الأنف والجبين والذقن، لكن منطقة الخدود جافة شديدة الاحمرار... وده راجع للتعرض المستمر للتكييف في الصيف والدفاية في الشتاء؛ فده بيحوّل البشرة العادية إلى مختلطة جافة وبيزود من ظهور التجاعيد حتى لو كنتِ في سن الثلاثين. وبيرجع أسباب التحوّل ده نتيجة خلو الجسم من المياه، فيبدأ الجلد في الانهيار؛ لأنه بيحاول يرطب نفسه بس مش لاقي المياه الكافية لذلك, وكمان لو استخدمتِ الصابون العادي ده بينشف الخد فيا ريت تستخدمي الطبي. ويعتبر أحسن حل للبشرة دي هو إننا نحاول نعتني بيها أكثر بحيث لا ينقصها أي دهون في الوجه فنستخدم مرطب الصبح وبالليل، ونراعي عدم نقص المياه في الجسم فلازم نشرب مياه كتيرة. وبصفة عامة.. ممكن تنظفي بشرتك المختلطة الجافة باستخدام مزيل لماكياج العين في الصبح، وبعدين تغسلي بشرتك بغسول البشرة المختلطة الجافة، وبعد كده تتنشفي بفوطتك بطريقة التربيت ومش بعنف، وبعد كده تحطي الكريم المرطب الخاص للنهار، خصوصاً في الصيف؛ لأن البشرة بتنشف أكثر, وبعد كده حطي الماكياج بطريقة خفيفة بس لازم تتأكدي إن كريم الأساس فيه دهون وممكن إنك تستخدمي ماركة زي "نيفيا" أو "برجوا" أو "كيرولان".. وبالليل ممكن تشيلي الماكياج بقطنة باستخدام مزيل الماكياج وكمان تحطي كريم الليل الغني بالفيتامينات تحت العين قبل النوم. بعد ما عرفنا طريقة العناية بالبشرة المختلطة، تعالوا دلوقتي نعرف مع بعض ماسكات طبيعة مفيدة للبشرة المختلطة.. غسول ماء الزهر المكونات: • 2 معلقة كبيرة ماء زهر "متوفر عند العطار". • نعناع أخضر. • نقطتين عصير ليمون. الطريقة: انقعي النعناع الأخضر لمدة ساعة في شوية ميه، وبعد كده خدي الميه دي وضيفي إليها عصير الليمون وماء الزهر، هاتي قطنة وحطيها في الخليط السابق ومرريها مرتين على بشرتك، بعد مرور ربع ساعة اشطفي بشرتك بماء فاتر، ممكن تعملي الغسول ده مرتين أو ثلاثة في الأسبوع وهتشوفي الفرق بنفسك. ماسك البيض لو حاسة إن بشرتك مرهقة وتعبانة ولونها باهت، ممكن تعملي الماسك ده علشان ترجعي لها حيويتها ونضارتها... المكونات: • صفار بيضة. • عصير 1/2 ليمونة. • معلقة كبيرة صلصال أبيض "متوفر عند العطار". • معلقة زيت لوز حلو. • معلقة عسل أبيض. الطريقة: اخلطي عصير الليمون مع الصلصال الأبيض وقلبيهم مع بعض لغاية ما يمتزجوا تماماً، بعد كده ضيفي صفار البيضة وزيت اللوز الحلو والعسل الأبيض وقلبيهم كلهم مع بعض، افردي الخليط السابق على بشرتك، وسيبيه لمدة 20 دقيقة.. وبعد كده اشفطي بشرتك بالماء الفاتر، الماسك ده ممكن تعمليه كل ما تحتاجي له، وكمان لو عندك مناسبة وعايزة بشرتك تبان منورة وصافية.. لغاية هنا وخلص كلامنا عن البشرة المختلطة وفي انتظار أسئلتكم ومقترحاتكم وإلى اللقاء في الأسبوع القادم،،،،
