جمالك من الطبيعة مع رانيا.. حمامك بالأعشاب الطبيعية و"القطون" للهالات السوداء

أهلاً وسهلاً بيكم في أوّل حلقة من حلقات "جمالك من الطبيعة مع رانيا" على "قمر 14"..
النهارده في أول حلقة هنتكلّم عن أساسيات العناية الشخصية، وهنتعلّم إزاي ناخد دُش بطريقة صحيحة، وهنعرف شوية حاجات جميلة أوي ممكن نعملها وإحنا بناخد الحمام اليومي بتاعنا، وكمان هنشوف مع بعض طرق لعمل ماسكات طبيعية وصابون للبشرة...
تابعونا علشان نشوف هنقدّم إيه في حلقتنا...
الليفة العادية.. لتدليك يومي لبشرة الوجه والجسم
الليفة المصرية الطبيعية اللي كلنا بنستخدمها من أحسن الحاجات اللي ممكن نستخدمها لتنظيف البشرة سواء كانت بشرة الوجه أو الجسم، لكن أهم حاجة إننا ننظف الليفة ونطهرها كويس قبل الاستخدام، وكمان نقصها بطريقة صحيحة...
وأول حاجة هنعملها أول ما نشتري الليفة هي إننا نبلها شوية بالماء علشان تبقى طرية ونقدر نتعامل معاها، وبعد كده هنبدأ نقصها...
والليفة ممكن نقصها لجزئين أو ثلاثة على حسب حجم الليفة، أول جزء هنقصه هو أضعف وأصغر جزء في الليفة واللي بيكون موجود على طرف الليفة، والجزء ده بعد ما بنقصه بنستخدمه لعمل مساج لبشرة الوجه وتنظيفه، أما باقي الليفة فبنفتحه بالطول، لكن ماينفعش إننا نستخدم الليفة وهي مقفولة، ولو الليفة اللي معانا كبيرة شوية ممكن نقسّمها لنصفين بالطول.
بعد ما قطّعنا الليفة هنبدأ نطهّرها؛ لأنها طبعاً بتكون متربة ومتسخة جداً، وتطهير الليفة بيتم على مرحلتين؛ المرحلة الأولى: إننا ننقعها في طبق فيه مية سخنة وملح، وبنسيبها فيها لمدة ساعة، وبعد كده بننقعها مرة تانية في مية سخنة فيها مقدار غطاء من أي مطهر نفضّله، ونسيبها لمدة ساعة.
وبكده الليفة هتكون جاهزة تماماً للاستخدام سواء الجزء الخاص ببشرة الوجه أو الجزء الخاص بالجسم، وطبعاً الليفة دي بتعمل كأنها مساج طبيعي ممكن نستخدمها لمناطق: الظهر، والكوع، والركب، والكعبين، مرتين أو ثلاثة خلال اليوم.

إضغط لمشاهدة الفيديو:
الليفة المغربية.. لتنظيف عميق للبشرة
الليفة المغربية مش مصنّعة من خامات طبيعية زي الليفة المصرية، لكنها مصنّعة من نوع قماش خشن بيعمل على سنفرة الجلد، والليفة دي مش للاستخدام اليومي، لكن بنستخدمها من مرة لمرتين خلال الأسبوع، ويُفضّل قبل ما نستخدم الليفة المغربية إننا نعرّض جسمنا للبخار لفترة طويلة؛ علشان لما نبتدي نفرك بها الجسم تطلع كل الخلايا الميتة والشوائب اللي موجودة على الجسم.

إضغط لمشاهدة الفيديو:
لوشن ليلي.. لبشرة نضرة
دلوقتي هنعمل مع بعض لوشن طبيعي بالليمون والكريم لترطيب وتفتيح الجسم، ولكن اللوشن ده هنستخدمه بالليل بس؛ لأن الليمون من الحاجات اللي لو استخدمناها واتعرّضنا بها للشمس بيسمر البشرة، لكن لو استخدمناها أثناء فترة الليل ونمنا به بيفتّح البشرة جداً.
ومكونات اللوشن هي:
* بشر ليمونة
* ملعقة كريم مرطب "أي نوع نفضّله"
* عصير ليمونة كاملة
وهنخلط المكوّنات دي مع بعضها، ويفضّل إننا نحتفظ باللوشن ده في أي وعاء زجاجي أو أركوبال أو بيركس؛ لأن الأوعية البلاستيك بتتفاعل مع الليمون والخل.
واللوشن ده بندهنه على الجسم كله بعد ما ناخد حمامنا، ونفرك جسمنا بالليفة، واللوشن ده ممكن نستخدمه بشكل يومي، ولكن شرط أساسي إننا نستخدمه بالليل، وما نتعرّضش به للشمس، ومع الوقت هنحس إن جسمنا بقى ناعم ونظيف ولونه فاتح.

إضغط لمشاهدة الفيديو:
الكاموميل والمريمية والورد المجفف.. لحمام صباحي منعش
طبعاً من الحاجات اللي أحب أقولها لكل بنت؛ هي إننا ما ينفعش ناخد دُش، وتحديداً بالليل من غير ما نستخدم بعده كريم مرطب أو لوشن، وزي ما شوفنا مع بعض إزاي ممكن نعمل لوشن طبيعي بمكوّنات بسيطة جداً...
كمان فيه حاجات حلوة أوي ممكن نعملها وإحنا بناخد حمامنا الصبح قبل ما ننزل نروح الجامعة أو الشغل؛ علشان تدينا إشراقة ونشاط وحيوية...
ومن أهم الحاجات هي الأعشاب ودي ممكن نستخدمها بأكتر من طريقة، فمثلاً:
1- ممكن نغلي 3 ملاعق كبيرة من الكاموميل (الشيح) في كوب كبير من المية، ونسيبهم يغلوا لمدة ربع ساعة، وناخد المحلول المركّز ده ونصفّيه ونشطف به جسمنا وشعرنا بعد الحمام.
2- ممكن نستخدم عشب المريمية، ونغليها بنفس الطريقة اللي عملنا بها الكاموميل، وعشب المريمية من الأعشاب المفيدة جداً للبشرة والشعر، لكن ناخد بالنا إن مغلي المريمية مع الاستخدام اليومي ممكن يغمق لون الشعر.
3- مش لازم إننا نغلي الأعشاب بالطريقة اللي فاتت، لكن إحنا ممكن نخلط مجموعة مختلفة من الأعشاب، ونحطّها في شاش، ونربطها كويس، ونعلّقها في الدُش؛ بحيث إن المية وهي نازلة تاخد معاها من رائحة الأعشاب؛ علشان تدينا إحساس منعش ولطيف، ومن الأعشاب اللي ممكن نخلطها مع بعض هي: "ملعقة كبيرة ورد مجفف + ملعقة كبيرة مريمية + ملعقة كبيرة كاموميل".

إضغط لمشاهدة الفيديو:
حمام الورد.. لنعومة وراحة القدمين
زمان أجدادنا قالوا إن الملح والمية السخنة مفيدين للقدمين جداً، وطبعاً ده كلام صحيح، لكن كمان من الحاجات اللي ممكن نضيفها على حمام الماء الساخن والملح هو زيت الورد والورد المجفف، والحمام ده بيريّح القدمين جداً وبينعم الجلد..
والتركيبة سهلة جداً وهي عبارة عن:
* ملعقة كبيرة ملح
* ملعقة كبيرة ورد مجفف
* ملعقة كبيرة مش مليانة أوي زيت ورد
وكل اللي عليكِ إنك تخلطي المكوّنات دي مع بعضها، وبتحطّيها في طبق بلاستيك، وبعد كده بتضيفي عليها مية سخنة على قدر احتمالك، وبتنقعي رجلك في المية دي لمدة من 20 : 30 دقيقة، وبعد كده افركي رجلك بالحجر، وبتركّزي طبعاً على المناطق الخشنة والمشققة، وبعد كده اشطفي رجلك ونشّفيها كويس، وادهنيها بزيت اللوز الحلو.
والحمام ده ممكن نعمله بشكل يومي؛ لأنه بيدّي ترطيب للجلد، ونتيجته بتكون كويسة أوي.

إضغط لمشاهدة الفيديو:
ماسك مغذّي لكل أنواع الشعر
طبعاً الشعر من أكتر الحاجات اللي بتظهر جمالنا، علشان كده لازم نهتم به جداً، وأنا بانصحك إنك تغسلي شعرك مرتين على الأقل في الأسبوع مهما كان نوع شعرك، بالإضافة إلى إنك تعملي له حمام زيت أو كريم مرتين في الأسبوع.
ودلوقتي هنعمل مع بعض ماسك مغذّي ومرطّب لكل أنواع الشعر، والماسك ده عبارة عن:
* ملعقة كبيرة حمام كريم أو بلسم
* ملعقة كبيرة عسل
ويُفضّل إن أثناء تقليب الماسك ده إنك تستخدمي فرشة الصبغة، وبعد ما تغسلي شعرك مرتين بالشامبو، بتبدئي توزّعي الماسك ده على شعرك بداية من الجذور ولغاية أطراف الشعر، وبتسيبيه على شعرك لمدة من 20 : 30 دقيقة، وبعد كده بتشطفيه بمية عادية.
والنتيجة اللي بنحصل عليها بالمواظبة على الماسك ده هي إننا بنحصل على شعر لامع وصحي ونظيف، وكمان بيقضي على القشرة الخفيفة، بالإضافة إلى أنه بيزيد من قطر الشعرة، وده طبعاً هيبقى مفيد لأصحاب الشعر الخفيف.

إضغط لمشاهدة الفيديو:
"القطون".. للتجاعيد الرفيعة والهالات السوداء حول العين
الهالات السوداء حول العيون مشكلة بتضايق بنات كتيرة جداً، وزي ما إحنا عارفين إن فيه حاجات طبيعية بتساعد على تفتيح الهالات السوداء زي الخيار.
النهارده بقى هنعمل مع بعض جِل باستخدام مادة طبيعية مفيدة جداً في علاج التجاعيد الرفيعة وتفتيح الهالات السوداء، وبتدخل في تصنيع أنواع من الكريمات الغالية جداً، والمادة دي اسمها "بذر القطون"، وفيه منها نوعين: نوع بلدي، وده بيبقى لونه غامق شوية، ونوع تاني مستورد، وده بيبقى لونه فاتح.
وبالنسبة لطريقة استخدامه فهي بسيطة جداً، وكل اللي عليكِ إنك تجيبي ملعقة كبيرة من بذر القطون، وتحطّيها في برطمان زجاجي له غطاء، وتضيفي عليها مية سخنة تملى نصف حجم البرطمان، وبتسيبيه لغاية ما يبرد شوية، وبعد كده بتشيليه في الثلاجة، وتسيبيه لغاية تاني يوم، وبعد كده تقدري تستخدميه الصبح أو بالليل، زي ما إنتِ عايزة، وبتدهنيه على منطقة العيون من جوه لبره من فوق وتحت العين.

إضغط لمشاهدة الفيديو:

وفي نهاية الحلقة الأولى من حلقات "جمالك من الطبيعة مع رانيا"...
أتمنّى إنكم تكونوا استفدتم...
واستنونا في الحلقات اللي جاية...
علشان هنقدِّم لكم حاجات كتيرة مفيدة لكم..
لحل مشاكل البشرة والشعر...
وكمان هنقدِّم أفكار مختلفة للعناية بالبيت...
تابعونا دايماً على "قمر 14"...
إلى اللقاء،،،،