بالفيديو.. خطوات "ميك أب" سريع للصبح

أهلاً بيكم في حلقة جديدة من "بص وطل"، والنهارده معايا ومعاكم "أميرة أحمد"، ومعاها هنشوف إزاي نعمل "ميك أب" لفترة الصبح، ونضمن إنه يكون خفيف ومناسب لأي بنت رايحة الجامعة أو الشغل.
يلّا نشوف مع بعض...
ماسكات طبيعية لتحضير البشرة قبل ال"ميك أب"
أوّل حاجة لازم نعملها قبل ما نبدأ نحط ال"ميك أب" إننا ننضف الوش كويس، وممكن نستخدم ماء الورد في تنظيف البشرة؛ لأنه مفيد جداً لتنقية البشرة وتخليصها من الشوائب والدهون الزيادة، وكمان بيضيّق المسام الواسعة.
وفيه ماسك حلو أوي ممكن نعمله قبل ال"ميك أب" وهو عبارة عن:
- بياض بيضة.
- نقطتين عصير ليمون.
وبنخلطهم مع بعض، وندهن بهم البشرة، ونسيبهم على البشرة لغاية ما الماسك يجف تماماً، وبعدين نغسله بماء فاتر وبعد كده ماء بارد.. وممكن نستخدم النشا لمشكلة المسام الواسعة، وكمان نقدر نستخدم مية الرز، ودي بتخلّي البشرة ناعمة ونضرة زي بشرة الأطفال بالظبط.
كبسولات فيتامين E لنضارة البشرة
من أكتر الحاجات اللي بتفيد البشرة هي كبسولات فيتامين E، واللي بيعمل كمضاد للأكسدة، وبيمنع ظهور التجاعيد المبكرة، وممكن إنك كل يوم تجيبي كبسولة فيتامين E وتحطيها على بشرتك بطريقة التربيت، وخصوصاً على أماكن التعبير في الوش زي المناطق اللي بتظهر لما بنيجي نضحك أو نكشّر.
كمان مش لازم ننسى واقي الشمس "الصن بلوك"؛ لأنه بيحمي البشرة من أشعة الشمس الضارة، وبنستعمله سواء في الصيف أو الشتاء، وكمان لو بشرتنا جافة لازم نستخدم لها كريم مرطب يومياً.

إضغط لمشاهدة الفيديو:
ودلوقتي تعالوا نبدأ مع بعض في خطوات ال"ميك أب"
الخطوة الأولى:
أوّل حاجة هنبتدي بها هي كريم الأساس، ومش هنحط منه كمية كبيرة؛ لأن ده "ميك أب" للصبح، وبنوزّع كريم الأساس على جزء من الوش، وبعدين نفرده بالفرشة أو بإيدينا، وطبعاً درجة كريم الأساس بتبقى أفتح درجة واحدة من لون البشرة؛ علشان لو أفتح من لون البشرة بدرجة كبيرة مش هيبقى شكلنا طبيعي.
وفي نصيحة مهمة أوي بلاش نستخدم "الآي شادو" الأبيض تحت العين، ونستخدم مصحح العيوب اللي بيكون لونه على بيج علشان اللون الأبيض هيبيّن الهالات السودة أكتر.
الخطوة الثانية:
دلوقتي هنبدأ نحط اللوس باودر (البودرة السايبة)، وطبعاً بنختارها بنفس لون البشرة بالظبط علشان تدي شكل طبيعي.
الخطوة الثالثة:
الخطوة دي هي خطوة رسم العيون، وأوّل حاجة هنعملها هي إننا هنحط "آي شادو" (ظل الجفون) بلون خفيف وهادي أوي، وبالنسبة لتحديد العين فإحنا هنستخدم كحل زيتي، وممكن إننا نستخدم أي لون تاني فاتح، لكن نحاول على أد ما نقدر نبعد عن الأسود في فترة الصبح، وخصوصاً لو العين صغيرة، لكن العيون الواسعة بصفة عامة بيناسبها الكحل جداً وأي لون ممكن يبقى حلو أوي معاها.
بعد كده نسيّح الكحل اللي فوق العين بالفرشة؛ علشان ما يبقاش شكله صريح، وآخر حاجة هنعملها في رسم العين هي إننا نحط "الماسكرا".
الخطوة الرابعة:
بعد ما خلّصنا رسم العين، نبدأ نحط "البلاشر" (أحمر الخدود)، واللون اللي هنستخدمه للموديل اللي معانا هو اللون الخوخي؛ لأنه مناسب جداً مع البشرة الخمرية، وكمان بيبقى شكله طبيعي جداً.
الخطوة الخامسة:
ودي آخر خطوة هنعملها النهارده، وهي رسم الشفايف بأحمر الشفاه، وهنستخدم الأوّل قلم التحديد، ونبدأ من نص الشفايف اللي تحت، وبعد كده نطلع على الزاويتين الخارجتين ونملى الشفايف كلها، وبعد كده نحط ملمع الشفايف بلون خفيف أوي.

إضغط لمشاهدة الفيديو:
وبكده تكون خلصت حلقتنا النهارده، وأهم حاجة بنأكد عليها لأي بنت بتعمل "ميك أب" وهي نازلة الصبح إنها تختار ألوان هادية ومناسبة مع لون بشرتها..
ويا ريت الحلقة تكون عجبتكم..
وتكونوا اتعلّمتم حاجة جديدة..
وإلى اللقاء في حلقات تانية..
سلااااااااااااااااام،،،