جوز الهند.. الثمرة السحرية للعناية بجمال شعرك وبشرتك

أعده للنشر: مها مصطفى
أهلا بكل بنات "قمر 14" في حلقة جديدة من حلقات "جمالك من الطبيعة مع رانيا" مع بداية سنة جديدة إن شاء الله تكون كلها خير وسعادة وحب..
النهارده حلقتنا هتكون خاصة بجوز الهند، وهنعرف أد إيه هو مفيد للبشرة والشعر؛ سواء كانت الثمرة أو الزيت أو اللبن أو جوز الهند المبشور..
في البداية تعالوا نعرف شوية معلومات عن جوز الهند وفوائده:
1- ثمرة جوز الهند بتدخل في العديد من الحلويات، وفيه ناس بتستخدم زيت جوز الهند في الطبخ؛ لأن سعراته الحرارية قليلة ومش بيتخّن.
2- الميه الموجودة داخل ثمرة جوز الهند قليلة بس مفيدة جدا ومغذية، وممكن نستخدمها في عمل شامبو ولوسيون للجسم.
3- جوز الهند بيعتبر مطهر للجلد، وبيساعد في مقاومة عوامل الشيخوخة؛ لأنه بيعمل على تأخير ظهور التجاعيد، وبيخفّض نسبة الكوليسترول، وبيساعد في إنقاص الوزن.
4- لازم ناخد بالنا إن زيت جوز الهند بعد ما بيسيح لونه بيبقى أصفر أو أبيض، أما وهو مجمّد لونه بيبقى بيج فاتح.

ودلوقتي هنعمل بعض الماسكات اللي هنستخدم فيها جوز الهند..
ماسك لشعر أكثر كثافة
المقادير:
* زيت جوز الهند
* زيت جرجير
* زيت ثوم
الطريقة:
هنخلط نسب متساوية من كل الزيوت دي مع بعضها، والماسك ده بيتحط على فروة الرأس فقط، وبنسيبه على شعرنا من 2 : 4 ساعات، والماسك ده بيغذّي الشعر ويتقّله جدا، وكمان بيساعد على التخلّص من مشكلة القشرة.

إضغط لمشاهدة الفيديو:
ماسك للتخلّص من قشرة الشعر
المقادير:
* 3 ملعقة كبيرة زيت جوز الهند
* 3 ملعقة كبيرة خل تفاح
الطريقة:
هنخلط المكونات مع بعض، ونحطّها على جذور الشعر فقط، ونسيبها لمدة نصف ساعة، والماسك ده بيغذّي الشعر ويتقّله وينعّمه، وكمان بيقضي على القشرة بالاستخدام المتكرر، بالإضافة إلى إنه بيدّي لمعان للشعر.

إضغط لمشاهدة الفيديو:
ماسك لتقوية الشعر
المقادير:
* 3 ملعقة كبيرة زيت جوز الهند
* صفار بيضة (بيحتوي على نسبة بروتين زي الكيراتين مهمة جدا للشعر)
* 3 ملعقة كبيرة زيت زيتون
الطريقة:
بنخلط المقادير مع بعضها، وبنحطّها على فروة الرأس والشعر كله وبنسيبه من 45 : 60 دقيقة، والماسك ده بيقوّي الشعر ويغذّيه.

إضغط لمشاهدة الفيديو:
ماسك لتغذية الشعر
المقادير:
* 5 ملعقة كبيرة زيت جوز الهند
* ثمرة موز
الطريقة:
نهرس الموزة كويس، وبعد كده نضيف عليها زيت جوز الهند، وبنحط الماسك ده على فروة الرأس والشعر كله، وبنسيبه من 30 : 45 دقيقة على الشعر.
ومن المعروف إن الموز بيتخلّل ساق الشعراية وبيغذيها جدا، وممكن الماسك ده نستخدمه لبشرة الوجه والرقبة، لكن للبشرة شديدة الجفاف والبشرة الحساسة.
جوز الهند المبشور لسنفرة الوش والجسم
المقادير:
* 3 ملعقة كبيرة جوز هند مبشور
* ملعقة كبيرة زيت جوز هند
* ملعقة كبيرة زيت ورد
الطريقة:
بنخلط المقادير كلها مع بعض، ولازم ناخد بالنا إن الماسك ده بنفرده على الجسم وهو مندّي بالميه، وبنفركه كويس، والماسك ده بيزيل طبقة الجلد الميت بقوة، وبيخلّي البشرة ناعمة جدا وبيعطي رائحة عطرة للجسم.
وممكن نستخدمه في سنفرة بشرة الوش، بس في الحالة دي بنقلل زيت الورد شوية.

إضغط لمشاهدة الفيديو:

خلصت حلقتنا النهارده..
استنونا الحلقة الجاية..
علشان تعملوا معايا صابون وشاور جل بمكونات طبيعية..
ويا رب تكون السنة دي سنة سعيدة علينا كلنا..