كباب الفراخ بالخضار

النهارده هنعرف مع بعض طريقة عمل كباب الفراخ بالخضار، وعلى فكرة الطريقة دي سهلة جدا ومش هتاخد منك وقت كتير..
كباب الفراخ بالخضار
المقادير:
* 1⁄2 كيلو صدور فراخ مقطّعة مكعبات متوسطة الحجم
* ثمرة فلفل أحمر مقطّع مكعبات متوسطة الحجم
* ثمرة بطاطس مقطّعة مكعبات متوسطة الحجم
* ثمرة باذنجان مقطّعة مكعبات متوسطة الحجم
* ثمرة طماطم مقطّعة مكعبات متوسطة الحجم
* ثمرة كوسة مقطّعة مكعبات متوسطة الحجم
* ثمرة بصل مقطّعة مكعبات متوسطة الحجم
* ملعقة كبيرة بهارات فراخ (هتلاقيها عند العطار)
* 1⁄2 ملعقة صغيرة روزماري
* أسياخ معدنية أو خشبية
* 3 فصوص ثوم مفرومين
* 1⁄4 كوب زيت زيتون
* 1⁄2 كوب زبادي
* كوب مية بصل
* ملح وفلفل
الطريقة:
1- اخلطي مية البصل مع الملح والفلفل والروزماري وزيت الزيتون والزبادي والثوم المفروم، وبعد كده تبّلي بهم صدور الفراخ، وسيبيها في التلاجة مع التتبيلة لمدة 3 ساعات.
2- بعد كده، رصّي قطع الفراخ والخضار في الأسياخ؛ بحيث يكون ترتيبهم كالآتي: قطعة من صدور الفراخ، قطعة كوسة، قطعة باذنجان، قطعة بطاطس، قطعة بصل، قطعة فلفل، قطعة طماطم، وكرّري نفس الترتيب مع باقي الأسياخ لحد ما تخلص الكمية اللي عندك.
3- شغّلي شواية الفرن على درجة حرارة متوسطة، وحطّي أسياخ الفراخ بالخضراوات على صينية، ودخّليها الفرن، مع تقليب الأسياخ من وقت للتاني، لغاية ما تلاقي إن الفراخ لونها بقى دهبي، خرّجي الأسياخ من الفرن وحطّيها في طبق التقديم.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلااااااااااااااااااااام،،،