تارت التفاح بالقرفة

النهارده على "سفرة دايمة " هنقدّم لك طريقة تارت التفاح بالقرفة؛ بعد ما طلبها عدد كبير من أصدقائنا.. نتمنّى إنكم تجرّبوها وتبعتوا تقولوا لنا على النتيجة..

تارت التفاح بالقرفة
المقادير:
5 ثمرة تفاح
كوب جوز هند مبشور
ملعقة كبيرة قرفة
ملعقة كبيرة سكر
1/ 2 كوب زبدة
كوب دقيق
كوب سكر
بيضة
الطريقة:
1- سيّحي الزبدة على النار، وسيبيها تبرد شوية.
2- اخلطي السكر مع الدقيق، وبعد كده ضيفي عليهم البيضة وقلّبيهم مع بعض كويس، وبعد كده ضيفي الزبدة السايحة، وقلّبيهم مع بعض كويس، لغاية ما تتأكدي إنهم تجانسوا تماما.
3- بعد كده ضيفي جوز الهند على الخليط السابق، واخفقيهم مع بعض كويس جدا، لغاية ما تحصلي على عجينة لينة.
4- هاتي صينية مدهونة بالزبدة من القاعدة والجوانب، ورصّي فيها شرائح التفاح بعد ما تخلطيها بالقرفة وملعقة السكر، بس راعي إنه مايبقاش فيه مسافات فاضية بين شرايح التفاح.
5- صبّي خليط العجينة فوق التفاح، ودخّلي الصينية في فرن ساخن على درجة حرارة عالية، وسيبيها لمدة 40 دقيقة أو لغاية ما التارت يبقى لونه دهبي.
7- طلّعي الصينية من الفرن، وسيبيها شوية علشان تبرد، وبعد كده اقلبيها في طبق التقديم، وممكن تزيّنيها من على الوش بالكريم شانتيه.. وبالهنا والشفا.
وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..