بالحنة.. اعملي شاور جل لإزالة آثار حب الشباب

أعده للنشر: مها مصطفى
أهلا بكل بنات "قمر 14" في حلقة جديدة من حلقات "جمالك من الطبيعة مع رانيا".. حلقتنا النهارده عن العناية بالبشرة والجسم بماسكات ووصفات هنستخدم فيها مكونات من الطبيعة..


شاور جل بالحنة
المقادير:
3 ملعقة صغيرة حنة
3 ملعقة كبيرة صابون مغربي
ملعقة صغيرة عصير برتقال (اختياري)
عصير ليمونة
الطريقة:
هنخلط المقادير كلها مع بعض؛ بحيث نحصل في الآخر على شاور له قوام متماسك مش سايل أوي ولا جامد أوي.
نفرد الشاور على الجسم بالكامل ونسيبه من 10 : 15 دقيقة، مش أكتر من كده علشان الحنة ما تصبغش بلون تقيل على البشرة، بعدها بنفركه من على الجسم بالليفة المغربي، وندلّك الجسم من أسفل لأعلى في اتجاه القلب لتنشيط الدورة الدموية، وفي الآخر نشطف جسمنا كويس بالميه العادية.
الشاور ده يفضّل إننا نعمله على أد المرة؛ لأننا مش هينفع نحتفظ به أكتر من يومين أو تلاتة، وبنستخدمه مرة واحدة أسبوعيا، ومع الاستخدام هتحصلي على بشرة ناعمة وصافية جدا لها لون وردي رائع، ده غير إن الحنة بتساعد على تفتيح آثار حب الشباب اللي بتبقى موجودة على الجسم، وممكن نفس الشاور ده نعمله على بشرة الوش، بس مانسيبهوش أكتر من 5 دقايق.

إضغط لمشاهدة الفيديو:
ماسك بقرع العسل
المقادير:
* 2 أو 3 ثمرة قرع عسل صغيرة
الطريقة:
هنبشر القرع، ونحطّه في البانيو ونفتح عليه ميه سخنة، ونستنّى 10 دقايق لحد ما الميه تبقى دافية، وبعد كده بننزل في الميه دي، ونقعد فيها لمدة ساعة كاملة، وهو بيتعمل مرة واحدة بس في الشهر، والماسك ده بيهدّي البشرة جدا، وبيخلّيها ناعمة جدا ولونها وردي، وممكن نضيف معاها زيوت عطرية من عند العطار؛ زي: زيت البندق أو زيت الألف زهرة أو زيت الزهر الفرنساوي.
وبالنسبة للناس اللي مش هتقدر تقعد في البانيو لمدة ساعة، ممكن نستخدم بَشْر ثمرة كاملة من قرع العسل، ونخلطه مع ملعقة صغيرة من أي زيت عطري نختاره؛ زي زيت العطر أو عطر الألف زهرة، ونعمل به مساج للجسم بالكامل ونسيبه من 30 : 60 دقيقة.

إضغط لمشاهدة الفيديو:
وبكده تكون خلصت حلقتنا النهارده..
استنونا الحلقة الجاية مع زيوت تانية وماسكات أكتر..
سلام،،،