جمالك من الطبيعة مع رانيا.. تألقي في الكريسماس ببشرة ناعمة بلا حبوب

أهلا بكل أصدقائي.. النهارده حلقتنا هتكون خاصة برأس السنة، كل سنة وكلكم طيبين وبخير..
وأكيد كلنا في المناسبات دي بنحب نظهر بشكل حلو ومختلف..
علشان كده هنعمل مع بعض النهارده ماسك جميل لتنعيم البشرة وتفتيحها..
الكرة الفوارة.. لجسم ناعم خالٍ من الحبوب
الماسك ده طريقته جديدة ومختلفة عن الماسكات اللي عملناها قبل كده، وكمان بنستخدمها بطريقة مختلفة، الماسك ده بنشكّله على شكل كور، وبنحطها في البانيو وهو مليان مية سخنة أوي، وبنسيبها لمدة 3 دقايق علشان تفور في المية، وننزل فيها بعد ما نكون غسلنا جسمنا كويس أوي، وبنقعد في المية دي لمدة من 20 : 30 دقيقة، والكرة دي بنستخدمها مرة كل شهر..

والكرة دي بتدينا نتيجة حلوة أوي؛ لأنها بتدي نعومة وريحة حلوة جدا للجسم، وكمان بتعمل زي "كاسح" اللي بيعمل على إزالة الشوائب والأتربة والدهون الزائدة على الجسم.
وأنا حبيت أعمل لكم الكرة دي في رأس السنة؛ لأنها بتحتوي على الورود اللي بتكون مناسبة جدا مع جو احتفالات الكريسماس.

إضغط لمشاهدة الفيديو:
ودلوقتي تعالوا نعرف مكونات الكرة الفوارة..
* ملعقة كبيرة نشا
* ملعقة كبيرة بيكربونات
* كيس بيكينج باودر
* 2 ملعقة كبيرة ورد مجفف مطحون
* 3 ملاعق ملح
* ملعقة كبيرة زيت جوجوبا
* ملعقة كبيرة زيت ورد
* ملعقة كبيرة زيت سمسم
الطريقة:
بنخلط كل المكونات الجافة مع بعضها، وبعد كده نضيف الزيوت، وبالنسبة لزيت السمسم، فإحنا ممكن نزوّد في كميته بحيث إنه يدينا عجينة متماسكة نقدر نكوّرها بإيدينا.
والكمية اللي إحنا عملناها النهارده، تكفي لمرة واحدة سواء قسمناها على شكل 3 أو 4 كور صغيرة أو على شكل كرة واحدة كبيرة، كمان لازم نسيب الكرة علشان ترتاح لمدة يوم أو اثنين؛ علشان كل المكونات تتجانس مع بعضها.

إضغط لمشاهدة الفيديو:

ولغاية هنا خلص كلامنا عن الكرة الفوارة..
وأتمنى إنكم تستفيدوا بها في احتفالات الكريماس..
وممكن تهادوا بها أصحابكم..
وتابعونا علشان نكمل باقي وصفاتنا..
إلى اللقاء،،،

*********************
للرجوع للحلقات السابقة
اضغط هنا "جمالك من الطبيعة مع رانيا"
*********************