كريم كراميل بالموز والعسل

لكل الناس اللي عايزين يعملوا الكريم كراميل، جبنا لكم النهارده طريقة سهلة وسريعة علشان تعملي أحلى طبق كريم كراميل ليكي ولأسرتك.. جرّبيه وابعتي لنا رأيك فيه..
كريم كراميل بالموز والعسل
المقادير:
4 كوب ميه
2 كوب سكر
2 كوب عسل
2 1⁄2 كوب لبن بودرة
7 بيضات
1⁄4 ملعقة فانيليا
3 ثمرات موز مقطّع شرائح
1⁄4 ملعقة صغيرة ملح
الطريقة:
1- هاتي حلة واخلطي فيها الميه مع اللبن البودرة ونصف كمية السكر، وحطّيها على النار مع التقليب المستمر لحد ما اللبن والسكر يدوبوا تماما.
2- اخفقي البيض كويس وضيفي عليه الفانيليا وباقي كمية السكر وقلّبيهم كويس، ولما يتجانسوا تماما ضيفيهم على خليط اللبن اللي حضّرتيه.
3- حطّي العسل على النار، واستمري في تقليبه لحد ما يبدأ يغلي ولونه يبقى دهبي غامق شوية.
4- حطّي نصف كمية العسل المحروق في الصينية اللي هتعملي فيها الكريم كراميل، وحطّي عليها خليط البيض واللبن والسكر، وحطّي الصينية دي في حمام مائي، ودخّليها الفرن على درجة حرارة متوسطة لمدة 40 دقيقة.
5- طلعي الكريم كراميل، وحطّيه في التلاجة لحد ما يبرد تماما، وبعد كده اقلبيه في طبق التقديم، وحطي عليها باقي كمية العسل، وزيّنيه بشرائح الموز.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..