حبيبي من تاني هيرجع لي.. بس يا خوفي من أهلي

السلام عيلكم.. أنا معجبة جدا جدا بالموقع، وبجد باستفاد منه كتير جدا ..أنا نفسي ألاقي حل لمشكلتي، واعرف أنا صح ولا غلط؟
أنا اتعرفت على شاب من على النت من 3 سنين، وبجد حبيته جدا جدا جدا وهو كمان حبني أوي، وفعلا اتكلم مع أهلي بس من خلال التليفون بس، وكان متفق معاهم إنه هيجى يتقدم بس حصلت له ظروف غصب عنه؛ والدته توفيت وهو كان آخر سنة في كلية الحقوق وطبعا بسبب وفاة والدته رسب في الكلية؛ لأنها توفيت أيام الامتحانات، وطبعا ساعتها أهلي ماقتنعوش إنه فعلا عنده ظروف، وحسوا إنه بيتهرب وممكن تكون دي مجرد حجة مش أكتر.
المهم إننا سيبنا بعض، وأنا كنت باموت في بعده؛ لأني بجد كنت بحبه أوي، وبعدها اتقدم لي عريس تاني بعدها بحوالي أربعة أشهر، وقرينا فاتحة وقعدنا سبعة شهور، بس هو كان بيعاملني وحش جدا؛ دايما إهانة وجرح في كرامتي، وكان دايما ينتقد كل حاجة حتى أهلي، وماكانش بيعجبه حاجة أبدا، وكان دايما يقول لي تفكيري غلط، وعايزني أبقى مطيعة لأوامره وبس، طبعا في الآخر ماقدرتش استمر أكتر من كده وسيبنا بعض.
وحسيت بحنين واشتياق جامد لحبيبي الأولاني، وهو كان بيتصل بيّ، واتفقنا إننا نرجع لبعض، وإنه هيجي يتقدم ليّ بعد شهرين، وفعلا كلم والدتي وشرح لها ظروفه.. وإحنا مع بعض دلوقتي ولسه المفروض هيتقدم كمان كام شهر؛ بس بجد أنا بحبه أوي وهو كمان بيحبني أوي ومش هاقدر أبعد عنه تاني. أرجو النصيحة والإفادة أنا صح ولا غلط؟؟
hamslovley
لو عايز تفضفض لنا دوس هنا