غلطت مع بنت عمي وعايز أتجوز بنت عمتي

في الأول أنا باشكر الموقع ده جدا، وباشكر العاملين فيه، وأنا مشكلتي إني بحب بنت عمتي أوي، ونفسي إني اتجوزها، بس في نفس الوقت هي كانت ليها تجربة مع شاب، وهربت من البيت بتاعهم قبل كده وراحت عنده يوم، وكمان هي رومانسية أوي وطيبة أوي وساذجة أوي أوي، وأنا نفسي إنها تكون مراتي، وفي نفس الوقت أنا بحبها حب من طرف واحد.

وكمان كان لي تجربة مع بنت عمي، وكنا من حوالي سنتين قريبين من بعض أوي، وحصلت بيننا معاشرة بس من على الهدوم بس كانت كاملة.. أنا خايف إن بنت عمي دي تقول للعيلة عندنا اللي عملته معاها؛ فيحصل كارثة منها إن أبويا وعمي هيخسروا بعض، ومنها إني هاخسر بنت عمتي اللي أنا بحبها، وكمان أبويا هيطردني من البيت، يا إما هيقتلني.
أرجوكم أفيدوني؛ لأني خلاص قربت أموت من كتر التفكير في الموضوع ده، أستحلفكم بالله أن تسرعوا في الرد على رسالتي.
Good.news


لم أتشرف صديق "بص وطل" العزيز بمعرفة صاحب المشكلة؛ يعني سنك، طالب ولا اتخرجت، تعمل أو لا تعمل، علاقتك بأهلك التي سمحت لك بالتعدي على حقوق ربنا في أهلك وبدل ما تصونها سرقتها، وكمان الأهم علاقتك بربك الذي لا تخاف منه، وبدل ما تفكّر في بنت عمك التي اختليت بها اختلاء الزوج بالزوجة الحائض (من على الهدوم) بتفكر تتركها، وكمان حالتك النفسية والعقلية التي تجعلك تحب بنت عمتك من طرف واحد، وهي غارقة في حب واحد ثاني وهربت علشانه وقضت عنده يوم، ويمكن كانت تعمل مثلك من على الهدوم برضه.
وسأجعل كل كلامي على سبيل الافتراض لا الحقيقة؛ حيث لا أعلم من أنت، ولا الظروف التي تدفعك لتطلب ما تطلب.
فلنفترض مثلا أنك شاب مراهق لم يتعلم ولا يعرف حدود الله أو يعرفها ونسي الله فنسيه الله، وتركت شيطانك يلعب بك كما يلعب بالدمية، ويحرّكها كيفما شاء، وبناء على ذلك جعلك تحب التي لا تشعر بك من طرف واحد، وتخدع اللي بتحبك ومكّنتك من نفسها من فوق الهدوم، وكمان تنتظر أنها تقول لأبيها يمسك في أبيك ويخسروا بعض بعد ما يقتلوك أو يطردوك على أحسن تقدير.
يعني بدل ما تحب اللي بتحبك وبادلتك الحب والغرام؛ خايف منها تفضحك، وتقول عليك "حاميها حراميها"، وبدل ما تقول إنها كانت بتحبك وسمحت لك تعمل معها كده؛ هتقول إنك حاولت تغتصبها وتجرجرها للحرام، وساعتها يبقى قليل عليك طرد أبوك لك وقتل عمك لك، ولا هتصعب على حد، ولا دية لك أيضا.
وممكن أفترض كمان إنك راجل عاقل وكامل ومتعلم؛ لكن الشيطان تمكّن منك، وزيّن لك أن تحب اللي مش بتحبك وبتحب غيرك وهربت من البيت علشانه وقعدت عنده طول النهار، وتكره اللي بتحبك وفي إيدها سعادتك بالحب وبالسكوت؛ علشان أهلك مايعروفوش اللي أنت عملته.
يعني من الآخر هافترض إن شيطان ساكن في عقلك وماسكك من ودانك يحركك منهم يمين وشمال، وكل ما تتحسر على بنت عمتك اللي عايزها بعد ما هربت مع واحد.. يضحك عليك، وكل ما يتأكد أنك فقدت عقلك، وبدل ما تتمنى لبنت عمتك تتجوز اللي هربت معاه؛ علشان يسترها.. يضحك عليك، وكل ما يتأكد لك إن أبوك وعمك هيخسروا بعض بسببك يضحك عليك، وكل ما يعرف إنك لعبة في إيد بنت عمك تهددك على كيفها يضحك عليك، وفرحه الأكبر سيكون لما أبوك يطردك، وعمك يقتلك، وبنت عمتك تعرف إن ذيلك غير طاهر.
والفرض الثالث أنك تكون مش مدرك حقيقة ما تفعل؛ لسبب ما أنت أعلم به مني.. فما تفعل وتقول خارج عن نطاق العقل؛ فالعاقل هو اللي يتزوج اللي تحبه مش اللي تحب غيره وتهرب معاه، والعاقل هو اللي يتجوز بنت عمه اللي العلاقة بينهم وصلت لعلاقة الأزواج، ولو كانت من فوق الهدوم، والعقل يقول إن ستر بنت العم واجب وحق بالدم والعرض والشرف والرجولة... إلخ، والعقل يقول إنك تحافظ على الروابط الأسرية مش تقطعها وتفسد العلاقة بين أبوك وعمك، والعقل يقول إنك تحافظ على علاقتك بأبوك علشان يساعدك في جوازك بدل ما يطردك.
الخلاصة أن العقل يقول إنك تتزوج بنت عمك؛ لمصلحتك ومصلحة عيلتك، وتسعى في زواج بنت عمتك من اللي بتحبه؛ علشان اللي بيحب حد بيحب له الخير، وعلشان مش معقول تحب واحدة بتحب واحد غيرك.

لو عايز تفضفض لنا دوس هنا