رانيا فريد شوقي تحيي ذكرى والدها: الأب الحنين ما بيروحش بيفضل جوه الروح

حرصت الفنانة رانيا فريد شوقي، على احياء الذكرى السابعة والعشرين لرحيل والدها الفنان الكبير فريد شوقي ، والتي تحل اليوم 27 يوليو.
ونشرت الفنانة رانيا فريد شوقي صورة لوالدها على صفحتها بموقع التواصل الاجتماعي "فيس بوك" ، وعلقت عليها قائلة : "النهاردة 27 سنة على غيابك يا بابا... بس الأب الحنين ما بيروحش، بيفضل جوه الروح ، في فيديو ليك كنت بتقول: "أنا صرفت فلوسي على بناتي... دلعتهم وفسحتهم ومليت عينهم."، ناس افتكرت إن الموضوع فلوس، لكن الحقيقة إنك كنت بتستثمر فينا قلبك وعمرك كله، وتزرع جوانا حب وخير وكرامة." .
وتابعت رانيا فريد شوقي قائلة : "كنت فاهم إن البنت لما تحس إنها غالية في بيتها محدش يقدر يقلل منها ، دلعتنا عشان نفهم إن الدلع مش منّة من حد، وفسحتنا عشان نشوف الدنيا بعينين شبعانة ومفيش حاجة تبهرنا ، حتى عقابك كان في سكوت ، سكوت يحرمنا من ضحكتك وحضنك، وكان أقسى من أي عقاب."

وأضافت رانيا قائلة : "كنت ترجع من المسرح في إسكندرية وتجيب لنا فطير بالسكر، حاجة بسيطة منك لكنها كبيرة جوانا، ولحد النهاردة بطلبه عشان أفتكر ضحكتك ، في آباء عندهم إمكانيات وما بيدلعوش، وبيوت مليانة فلوس لكنها فاضية من الحب ، لكن بيتك يا بابا كان مليان حنية وعطاء حتى بالحاجات الصغيرة، وده اللي ربّى جوانا قلوب شبعانة وأرواح واقفة بثبات." .

واختتمت رانيا التدوينة قائلة : الله يرحمك يا بابا، ويبارك في كل حاجة زرعتها جوانا ، والحمد لله إن ربنا خلقني بنتك."