النهارده على "سفرة دايمة" هنقدّم لكم طريقة عمل السبيط المحشي بطريقة سهلة وشهية جدا، تابعونا وابعتوا لنا كل الوصفات اللي عايزين تعرفوها. سبيط محشي المقادير: 4 حبات سبيط كوب رز مسلوق أو مطبوخ بصلة مفرومة 2 فص ثوم مفروم حبة فلفل أحمر مفرومة حبة فلفل أخضر مفرومة 1/ 2 كوب كزبرة مفروم 1/ 4 كيلو جمبري صغير 3 ملاعق كبيرة زيت ملح وفلفل ملعقة صغيرة كمون وكزبرة ناشفة وكركم الطريقة: 1- حُطّي الزيت في طاسة، وشوّحي فيه البصل والثوم، وقلبيهم لمدة دقيقتين، بعدين ضيفي عليه الجمبري وشوّحيه شوية، وضيفي الفلفل الألوان والكزبرة. 2- بعد كده حُطّي الرز وقلبيه مع الخليط، وتبليهم بالملح والفلفل والكمون وكزبرة ناشفة والكركم. 3- اغسلي السبيط كويس، وابدئي احشيه بالخليط، وممكن بعد ما تحشيه تقفليه بخِلّة، أو ممكن تسيبيه مفتوح ومع التسوية هيقفل لوحده. 4- بعد كده حطّيه في حلة، وتكوني مقطعة فيها شرايح جزر وكرفس وبصل، وبعدين حطّي عليهم السبيط، وحطي معاه 3/ 4 كوب ميه أو شوربة، وغطي الحلة وسيبيه يستوي على نار هادية. 5- بعد ما السبيط يستوي طلعيه من الحلة، وحطّيه في صينية، وخدي جزء من السائل المتبقي من سلق السبيط وحطّيه على السبيط، وبعدين دخليه الفرن لمدة 10 دقائق لحد ما يبقى لونه دهبي. 6- بعد ما تطلعيه من الفرن قطعيه نصفين، ورصّيه في طبق التقديم مع باقي كمية الحشوة اللي جهزتيها، وتكون سخنة، وقدميه.. بالهنا والشفا.
خلصت وصفاتنا النهارده.. استنونا كل يوم مع وصفات جديدة.. سلام،،،
