في الشتاء.. دفي نفسك بألذ المشروبات السخنة والمغذية

في أيام الشتاء الباردة بنحتاج طبعا لمشروب ساخن يمدنا بالطاقة والحرارة، وفي نفس الوقت بنبقى عايزين نجدد وننوع في شكل المشروبات دي علشان مانحسش بالملل..

علشان كده النهارده على "سفرة دايمة" هنقدّم لكم أفكار كتير لمشروبات ساخنة ومغذية جدا تقدري تنوّعي بينها، وتقدّميها لعيلتك طوال الشتاء.
************************

صبّي القهوة في الأكواب وزيّنيها بالكاكاو
قهوة على الطريقة الفرنسية
المقادير:
3 ملاعق صغيرة بن
كوب لبن
ملعقة صغيرة كاكاو
3 ملاعق صغيرة سكر
كوب ميه مغلية
ملعقة صغيرة فانيليا
ملعقة صغيرة قرفة
الطريقة:
1- اخلطي كل المكونات مع بعض، وحطّيها على النار، وقلّبيها كويس بشكل مستمر لحد ما القهوة تغلي.
2- صبّي القهوة في الأكواب، وزيّنيها برشة كاكاو، وقدّميها.. بالهنا والشفا.

************************

ممكن تزيني السحلب بالمكسرات والقرفة
سحلب باللبن
السحلب ممكن تعملي مكوّناته بنفسك، أو تشتري بودرة سحلب من أي سوبر ماركت أو من عند العطار، والطريقة واحدة في الحالتين.
المقادير:
كيلو لبن
1/ 2 كوب سمسم محمص
كوب سكر بودرة
4 ملاعق كبيرة نشا
ملعقة صغيرة قرفة
2 ملعقة صغيرة فانيليا
كوب رز مطحون ناعم
مكسرات محمصة
للتزيين:
قرفة وجوزهند
الطريقة:
1- علشان تجهزي خليط السحلب عندك في البيت اخلطي كل المكونات الجافة مع بعض؛ وهي: السكر البودرة - السمسم - النشا - القرفة - الفانيليا - الرز المطحون - المكسرات.
2- خدي كمية من الخليط ده، وحطيها مع اللبن على النار مع التقليب المستمر من وقت للتاني علشان الخليط يبقى ناعم، وسيبيه لحد ما اللبن يوصل للسمك اللي إنتي عايزاه.
3- صبّي السحلب في الأكواب وزيّنيه بالقرفة وجوز الهند والمكسرات.

************************

حطي عصير ليمون على الحمص قبل ما تقدميه
حمص الشام
المقادير:
1/ 2 كيلو حمص
كمون وملح وشطة
5 ثمرات طماطم مبشورة
3 فصوص ثوم مفرومين
بصلة صغيرة
ليمون
الطريقة:
1- اغسلي الحمص كويس، وانقعيه في الميه لمدة من 8 : 10 ساعات علشان يبقى أسهل في التسوية.
2- اغلي ميه، وحطّي فيها الحمص ومعاها الثوم المفروم والطماطم المبشورة والبصل المبشور.
3- سيبيه على نار هادية لمدة نصف ساعة، ولما تحسّي إنه دخل في السوا، حطّي عليه ملح وكمون وشطة، وعند التقديم حطّي عليه عصير ليمون.. وبالهنا والشفا.

************************

الموغات من المشروبات المغذية جدا
موغات
المقادير:
1/ 4 كيلو حلبة مطحونة
1/ 4 كوب سمسم
1/ 4 كوب نشا
1/ 2 كيلو لبن
1/ 2 كوب مكسرات محمصة
ملعقة زبدة
سكر
الطريقة:
1- اخلطي الحلبة والسمسم والنشا، وقلّبيها مع بعض، بعدين حطي الخليط ده مع الزبدة على نار هادية، وقلبيها لحد ما يبقى لونها دهبي.
2- حطي عليها اللبن تدريجيا مع التقليب المستمر علشان مايبقاش فيها كتل، وسيبيها تغلي، وقلّبيها من وقت للتاني، وبعدين صبّيها في الأكواب وزيّنيها بالمكسرات، وقدّميها.. بالهنا والشفا.

خلصت وصفاتنا النهارده..
استنونا كل يوم مع وصفات جديدة..
سلام،،،