مع الأسف.. خطيبي مؤدب زيادة عن اللزوم!

أنا مشكلتي إني كنت بحب واحد أوي بقالنا حوالي سنتين أو أكتر، بس هو مسافر لبلد عربي، ومع الأسف حصلت مشكلات بيننا كتير، وفيه ظروف منعتنا إننا نقدر نرتبط؛ لدرجة إني فكرت إنه بيلعب بيّ، وقررت إني اتخطب لإنسان كان متقدم لي عن طريق أحد زملائي في العمل.
الشخص اللي اتخطبت له إنسان كويس جدا من وجهة نظر أي حد يقعد معاه أو يعرفه، ومن وجهة نظري أنا كمان هو كويس ومحترم ومؤدب جدا، بس أنا في الأول كنت فاكرة إني هاحبه وهاعيش معاه كل اللي الدنيا حرمتني منه، بس مع الأسف هو شخص مؤدب زيادة عن اللزوم، وهادي زيادة عن اللزوم.
أنا مش قصدي في كلامي إني عايزاه يكون مش مؤدب؛ لا بس أنا عايزاه يكون كل حاجة في حياتي، يعني نخرج ونتفسح، ونهرج ونضحك، أنا طبعي هادية جدا، وهو هادي جدا، ودي مشكلة؛ لأني مرة كنت قاعدة على النت واتكلمت تاني مع حبيبي الأولاني ولقيته مش ناسيني، وعايز ييجي دلوقتي ويتقدم لي، وحسيت إن قلبي بيدق له.. هو فاهمني وبيعمل كل حاجة باتمناها، وأنا عارفة خطيبي هو بيحبني بس مش قادر يعمل اللي أنا عايزاه؛ بسبب طباعه.
أنا خايفة إني أكون باظلمه، أو إننا لما نتجوز أظلمه؛ لأني خايفة أفضل طول عمري حاسة إني ناقصني حاجة وماكملتش.. إحنا مخطوبين بقالنا شهرين ونص، يا ترى أعمل إيه؟!! أسيبه ولا أكمل؟!! أنا خايفة أخسره أو أجرحه؛ لأنه حد كويس جدا ومايستاهلش أي جرح.
يا ريت تردوا عليّ بسرعة؛ لأني عايزة آخد قراري بسرعة علشان ماظلمهوش معايا أكتر من كده.. عرفوني بس إذا كنت غلطانة واتسرعت في حكمي، ولا الشخصية دي ماينفعش تتغير وحياتي هتفضل معاه في روتين؟؟!!
yoyo

لو عايز تفضفض لنا دوس هنا