قالب الرز بالبشاميل والكبدة على "سفرة دايمة"

النهارده على "سفرة دايمة" هنقدّم لكم الرز بشكل جديد، وهو قالب الرز بالكبدة والبشاميل، وده طبق متكامل ومغذّي جدا، وشكل مختلف لتقديم الرز، جرّبوه وابعتوا لنا كل أسئلتكم لأكلات العيد وكمان كل مقترحاتكم.
رز بالبشاميل والكبدة
المقادير:
* 2 كوب رز
* ربع كيلو كبدة فراخ
* بصلة
* فلفل ألوان
* كوب زيتون
* 2 ملعقة دقيق
* 2 ملعقة زبدة
* 1/ 2 كيلو لبن
* 2 فصوص ثوم
* 2 1/ 2 كوب ميه
* مكعب مرقة دجاج
* 1/ 2 ملعقة صغيرة قرفة
* 1/ 2 ملعقة صغيرة بهارات
* 1/ 2 ملعقة صغيرة جوزة الطيب
* كوب جبنة رومي مبشورة
* ملح وفلفل
الطريقة:
1- أول حاجة هتفرمي البصل والثوم وتشوّحيهم في الزيت لمدة دقيقتين، وبعدين تقطّعي الكبدة قطع صغيرة وتحطّيها مع البصل.
2- سيبي الكبدة على نار عالية لحد ما تغلي وتنزل ميتها، وبعدين تشربها تاني، وقللي الحرارة وغطّي الحلة، وسيبيها تستوي على نار هادية.
3- قبل ما الكبدة تستوي قطّعي الفلفل شرايح رفيعة وضيفيه على الكبدة، وبعدين ضيفي الزيتون وتبّليها بالملح والفلفل والبهارات والقرفة وجوزة الطيب.
4- في الوقت ده اسلقي الرز؛ بإنك تحطّي ميه على النار لحد ما تغلي، وبعدين حطي فيها ملح، وملعقتين زبدة، ومكعب مرقة دجاج، وبعدين حطي الرز بعد ما تغسليه كويس.
5- سيبي الرز على نار عالية لحد ما يتشرب الميه، وبعدين هدّي الحرارة أوي وغطي الحلة، وسيبيها لحد ما الرز يستوي.
6- في الوقت ده اعملي البشاميل؛ وده بإنك تخلطي الدقيق مع الزبدة وتقلّبيهم على النار لحد ما يبقى لونها دهبي، وبعدين صبّي عليه اللبن وقلّبيه بسرعة علشان الدقيق مايعملش كتل، والصوص يبقى ناعم، وتبّليه بالملح والفلفل ومكعب مرقة دجاج، ولو حسيتي إن الصوص تقيل ممكن تزوّديه شوربة أو لبن لحد ما يوصل للسُّمك اللي إنتي عايزاه.
7- بعد كده رصي كل المكونات في القالب: حطي طبقة رز في الأول، وبعدين حطي الكبدة، وبعدين طبقة تانية من الرز، وبعدين حطي البشاميل في الآخر، ورشي عليه الجبنة ودخليه الفرن لمدة 20 دقيقة أو لحد ما وشه يحمر، وقدّميه بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،