استني إشارة قوية منه تقول لك إنه فعلا بيحبك

السلام عليكم.. أولا أنا باحترمكم جدا وباحترم رأيكم.. أنا محتارة في زميل لي في الشغل؛ برغم إني مش صغيرة في السن؛ بس تصرفاته تلخبط.
أخدت بالي إنه متابعني بنظراته، وكمان نبهتني زميلة لينا إنه مهتم بي؛ لكن فهمت إنه ماصرّحش وهي اللي أخدت بالها.. فكرت إن فيه أي ظروف تمنعه من إنه يتكلم في حاجة رسمي، وقلت مش هيرضى إنه يكون بيننا حاجة من غير ما يتقدم؛ لأنه متدين جدا.. ودي حاجة عجبتني فيه؛ بس أنا خجولة وعمري ما بابيّن اهتمامي لحد؛ لدرجة إني قلت لزميلتي: ده بيتهيأ لك، ومنعتها من الكلام في الموضوع ده.
من كام يوم لقيته باعت لي ماسج على الموبايل، بيقول لي: إنه محتاج كتاب ومش لاقيه، وبيطلب مساعدتي؛ ولأني ماعرفش رقم تليفونه اتصلت باللي باعت الماسج؛ فعرفني على نفسه.. أنا استغربت لكني سكت، وسألت لحد ما عرفت عنوان المكتبة اللي موجود فيها الكتاب؛ فبعت قلت له: اتصل بيّ.. وهو كلمني بشكل لطيف أوي وشكرني، وحتى سألني إذا كنت مهتمة يجيب لي نسخة من الكتاب.
أنا محتارة جدا في أمره ومش عارفة هو ليه بيتغير كده، ولو كان فعلا أنا مهمة عنده ليه مش بيحسسني بكده، أو يتصرف بشكل مباشر؟ وهو أنا المفروض أعمل حاجة في موقف زي ده ولا برضه أفضل مش مبينة اهتمامي له؟ ولو كان ناوي خير هو اللي هيقرّب مني؟ أنا مش عايزة أحط أمل على النقطة دي لا يبعد تاني في تصرفاته وأحتار زيادة.. ممكن تساعدوني؟؟
س

لو عايز تفضفض لنا دوس هنا