شوربة الحمص بالشطة والليمون على "سفرة دايمة"

لكل عشاق الأكل الحرّاق هنقدم لكم النهارده طريقة عمل شوربة الحمص بالشطة والليمون، جرّبوها وماتنسوش تبعتوا لنا كل طلباتكم على "سفرة دايمة".
شوربة الحمص بالشطة والليمون
المقادير:
* كوب حمص مسلوق
* بصلة متوسطة
* 7 - 8 أكواب ميه
* 2 مكعب مرقة دجاج
* ملعقة صغيرة كمون
* كوب طماطم مقطّعة مكعبات
* 4 فصوص ثوم مفرومين
* 1/ 2 ملعقة صغيرة قرفة
* 1/ 3 ملعقة صغيرة فلفل أحمر مطحون
* 1/ 4 ملعقة صغيرة شطة
* 2 ملعقة كبيرة زيت زيتون
* 1/ 2 كوب لسان عصفور
* 3 أكواب سبانخ مفرومة
* عصير ليمون
الطريقة:
1- حضري الحلة اللي هتعملي فيها الشوربة، وشوّحي فيها البصل والثوم في زيت الزيتون لحد ما يدبلوا ويبقى لونهم دهبي، وبعدين حطّي معاهم الكمون والقرفة والفلفل الأحمر والشطة، وقلبيهم لمدة دقيقة.
2- بعد كده حطي الطماطم والحمص ومرقة الدجاج و 6 أكواب من الميه، وقلبيهم كويس، وسيبي الشوربة لحد ما تغلي، وبعدين هدّي النار، وغطّي الحلة وسيبيها لمدة 10 دقائق.
3- حمري لسان العصفور في زبدة، وحطّيه على الشوربة وقلبيه، وسيبيها على النار تاني لمدة 15 دقيقة، ولو حسيتي إنها محتاجة ميه تاني ممكن تزوديها.
4- بعد ما لسان العصفور يستوي ارفعي الشوربة من على النار، وحطي السبانخ وعصير الليمون وغطّيها لمدة 5 دقائق؛ لحد ما السبانخ تستوي، وبعدين قدميها بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،