قالب الكفتة بصوص الطحينة والزبادي على "سفرة دايمة"

النهارده هنقدّم لكم طريقة جديدة لعمل الكفتة، يا ريت تجرّبوها وتبعتوا تقولوا لنا رأيكم فيها..
قالب الكفتة بصوص الطحينة والزبادي
المقادير:
* كيلو لحمة مفرومة
* ملعقة صغيرة بهارات
* 1/ 2 حزمة بقدونس
* 1/ 4 حزمة كزبرة
* 1/ 4 كوب بقسماط
* 3 فصوص ثوم
* بصلة متوسطة
* ملح وفلفل
* زيت
لعمل الصوص:
* ملعقة كبيرة زيت
* 1/ 2 كوب طحينة
* بصلة متوسطة
* كوب زبادي
* كوب ميه
* 1/ 4 كوب عصير ليمون
* ملح وفلفل
الطريقة:
1- اخلطي اللحمة المفرومة مع البقدونس والبصل والكزبرة والبقسماط، وتبّليها بالملح والفلفل والبهارات، وقلّبيهم كويس لحد ما المكونات تتداخل مع بعض.
2- قسّمي الكفتة على شكل كرات صغيرة، وبعدين اقليها في الزيت لغاية ما اللحمة يبدأ لونها يتغير وتدخل في السوى، وبعد كده رصّيها في القالب اللي هتدخليه الفرن.
3- جهّزي الصوص؛ بإنك تخلطي الطحينة مع الزبادي والميه وعصير الليمون والملح والفلفل، وقلّبيهم كويس مع بعض لغاية ما الخليط يتجانس مع بعضه.
4- افرمي البصلة وشوّحيها في الزيت لحد ما تدبل وبعدين حطي عليها الصوص اللي جهزتيه وقلّبيه كويس مع البصل.
5- وزّعي الصوص على الكفتة، ودخلي القالب في الفرن لمدة 20 دقيقة لحد ما الصوص يتسبّك والكفتة تستوي، وبعد ما تخرجي القالب زينيه بالبقدونس، وقدميه بالهنا واالشفا.

خلصت وصفتنا النهارده..
استنونا مع وصفات جديدة كل يوم..
سلام،،،