السلام عليكم أنا طالبة في كلية طب، مشكلتي ممكن يكون حلها عندي وأنا عارفاه بس أنا مش عارفة آخد القرار، أنا ماسبقش إني ارتبطت قبل كده بس اتعرفت على زميل لي، وكنا بنتكلم كأصدقاء، وعلاقتنا كانت أكتر من جيدة، وكان هو مرتبط بس فركش من غير ما يقول أو يعرّفني. بعدها بفترة طريقة الكلام اتغيرت واتحسنت أكتر، وبدأ يلمّح على الارتباط بس أنا ماكانش في بالي، وبعد ما عرفت إنه مش مرتبط عرض عليّ الارتباط ووافقت؛ رغم إني مش كنت عايزة أرتبط وأنا في الجامعة، وكنت بافضل الارتباط بعلم أهلي ومن البيت، بس وافقت لأني حسيت إن فيه حاجة حلوة ما بينا. بس هو فتح الموضوع مع قرب الامتحانات، وهو كان آخر سنة في الكلية، وبعد ما كنا بنتكلم كتير جدا يوميا أكتر من ساعتين، مابقاش يتصل إلا كل كام يوم، وبعدها جت الامتحانات واتقطعت أخباره، وأنا بعدها تعبت وماتكلمناش إلا بعدها بفترة، وعرفت إنه كان عنده ظروف وقتها، أنا سامحته وحسيت إنه كأن مافيش حاجة حصلت، بس برضه فضل على نفس شخصيته من عدم الاهتمام، وإنه مش بيسأل إلا كل كام شهر، بس هو كان من غير كلام أو تعامل بيبيّن لي إنه لسه فيه حاجة من ناحيته ليّ، وبعد ما خلّصنا الامتحانات اتكلم وحاول يبيّن لي إنه لسه عنده أمل فيّ، بس المشكلة إني مش عارفة هو عايزني ولا هو بمزاجه؟ أنا كرامتي مش سامحة لي إني أفتح الموضوع أو إني أتكلم إلا لما هو يتكلم، وأنا بجد باتعذب كتير؛ لأني حاسة إنه جرحني بإهماله، وعايزة أبعد بس برضه أنا باعزّه أوي، وأصحابي بيقولوا لي إني بحبه، بس مش قادرة آجي على نفسي أكتر من كده؛ رغم إني اهتميت بيه كتير جدا وهو مش كان بيسأل كتير. معلش أنا آسفة طولت عليكم، بس بجد يا ريت حد يرد علي؛ علشان أنا محتاجة آخد قرار وأنفذه. وشكرا جدا.