الكبيبة.. طريقة جديدة لتقديم السمك على "سفرة دايمة"

السمك من الحاجات الصحية جدا؛ علشان كده لازم نهتم دايما إنه يكون على سفرتنا صنف سمك على الأقل مرتين في الأسبوع؛ علشان كده قرّرنا النهارده إننا نقدِّم لكم طريقة عمل "كبيبة السمك"؛ علشان نجدد وننوّع في الشكل اللي بنقدّمه به، جرّبوا الوصفة وقولوا لنا رأيكم فيها..
كبيبة السمك
المقادير:
* 1/ 2 كيلو سمك فيليه
* 1/ 2 كيلو برغل منقوع
* بصلة كبيرة مفرومة
* ملعقة صغيرة قرفة
* 2 ملعقة كبيرة زيت زيتون
* 3 ملاعق كبيرة بقدونس مفروم
* 1/ 2 ملعقة صغيرة جوزة الطيب
* ملح وفلفل
الطريقة:
1- افرمي السمك في المفرمة، وبعدين ضيفي عليه البرغل بعد ما تصفّيه، وتبّليهم بالملح والفلفل وجوزة الطيب، وبعدين افرميهم مرة كمان لحد ما يبقى الخليط ناعم.
2- لتحضير الحشو: شوّحي البصل في الزيت لمدة 3 دقائق لحد ما يدبل، وتبّليه بالملح والفلفل والقرفة، وبعدين حطّي البقدونس، وقلّبيهم على النار لمدة 5 دقائق، وبعد كده ارفعيه من على النار، وسيبيه على جنب لحد ما يبرد.
3- ابدئي شكّلي السمك كرات صغيرة على شكل بيضة، وبعدين اعملي فجوة في النصف، واحشيها بكمية صغيرة من الحشو، وبعدين اقفليها كويس.
4- بعد ما تخلصي كل الكمية اللي عندك، اقليها في زيت غزير لحد ما يبقى لونها دهبي، وبعدين صفّيها كويس، وممكن تقدّميها باردة أو سخنة وتزيّنيها زي ما تحبي، وممكن تقدمي معاها سلطة الطحينة أو الكول سلو.. وبالهنا والشفا.

خلصت وصفتنا النهارده..
استنونا مع وصفة جديدة..
وابعتوا لنا كل طلباتكم على "سفرة دايمة"..
سلام،،،