فطائر اللحمة على سفرة دايمة

كتير بعتوا لنا تسألونا على وصفات خفيفة وسريعة للأطفال وكمان مناسبة لجو الصيف..

النهارده على "سفرة دايمة" هنقدم لكم وصفة جديدة وهي فطائر اللحمة..
تابعونا وابعتوا قولوا لنا رأيكم فيها..

فطائر اللحم
المقادير:
لعمل العجين:
* كوب زبد
* 3 كوب دقيق
* 2 صفار بيض
* ملعقة صغيرة كركم
* 3/4 كوب ماء مثلج
* 1/2 ملعقة صغيرة ملح
للحشو:
* 1/2 كيلو لحمة مفرومة
* بصلة متوسطة مفرومة
* 3 ملعقة كبيرة زيت
* 2 ملعقة كبيرة ماء
* 1/4 كوب بقسماط
* ملح وفلفل
* 1/2 ملعقة صغيرة زعتر
الطريقة:
1- اخلطي الدقيق والملح والكركم واعجنيهم مع الزبدة في العجانة.
2- اخفقي الصفار مع الماء وحطيهم على العجين تدريجيا، واستمري في العجن لحد ما تبقى العجينة ناعمة.
3- لفي العجين في بلاستيك وحطيه في التلاجة لمدة نصف ساعة علشان يتماسك.
4- في الوقت ده حضّري الحشو: شوحي البصل في الزيت لمدة 5 دقائق لحد ما لونه يبقى دهبي، وبعدين حطي اللحمة المفرومة.
5- قلّبي اللحمة مع البصل لحد ما يبقى لونها بني وبعدين حطي الزعتر وقلبيها وسيبيها لمدة 10 دقائق لحد ما اللحمة تستوي.
6- تبّليها بالملح والفلفل، ولو اللحمة لسه فيها سائل ممكن تحطي البقسماط وقلّبيها وسيبيها تبرد.
7- لعمل الفطائر: طلعي العجين من التلاجة وسيبيها تبرد لمدة 10 دقائق.
8- افردي العجين على سطح مرشوش دقيق وقطّعيه بالشكل اللي انتي تحبيه.
9- اخفقي البيض والماء وادهني به أطراف الفطيرة وحطي كمية من الحشو على أحد الطرفين.
10- اقفلي الطرف التاني واضغطي عليه بطرف شوكة.
11- رصي الفطائر على صاج مدهون بقليل من الزيت، واخبزيه في الفرن لمدة 30 – 35 دقيقة، وممكن تقدّمي معاها سلطة طحينة أو سلطة زبادي، وكمان ممكن تعملي مكرونة بالصوص الأبيض، وبالهنا والشفا.

ملحوظة:
ممكن تغيري في الحشو، مثلا سبانخ بالجبنة أو فراخ أو خضروات.
خلصت أكلة النهارده
استنونا كل يوم مع وصفة جديدة على سفرة دايمة
وماتنسوش تبعتوا لنا كل الأكلات اللي عايزين تعرفوها
سلام،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************