من حقك تختار زوجتك حتى لو كانت مطلقة

السلام عليكم ورحمة الله وبركاته.. أنا عندي مشكلة ومش عارف إيه حلها، وأتمنى إن حلها يكون عندكم.
أنا اتعرفت على بنت كانت شغالة معايا في محل، وبصراحة حبيتها أوي، وهي كمان حبتني؛ بس البنت دي كان عندها مشكلة إنها كانت متجوزة قبل كده، وعندها ولد، وبصراحة كانت حياتها صعبة أوي، وأبوها كان السبب في إنها اتجوزت واتطلقت.
المهم أنا في الأول كنت باقول لها إن حتى لو ربنا ماكتبش إن إحنا نكون لبعض، مش عايزك تزعلي مني، وهي وافقت، وبعدين فضلنا مع بعض لمدة 6 شهور تقريباً، وبصراحة أنا حاولت كذا مرة أتكلّم مع والدتي في الموضوع بطريق غير مباشرة؛ بس والدتي على طول كانت تقول لي إن الولد أو البنت اللي عندهم ظروف ماينفعش يتجوزوا إلا حد عنده ظروف برضه زي الطلاق مثلاً.
وبعد فترة، لقيت حبيبتي متغيرة معايا، وكل ما كنت أسألها فيه إيه كانت تقول لي مافيش حاجة؛ بس أنا قلبي كان حاسس إن فيه حاجة، وبعد إلحاح مني قالت لي أنا عايزاك تفوق من اللي إنت فيه إحنا مش مكتوب لينا نكون لبعض، ولقيتها اتغيرت معايا وبقت مابتردش عليّ، وكل مرة تتحجج بحاجة، وماعادتش عايزة تشوفني كمان، وتقول لي إن ده في مصلحتك؛ بس أنا ماكنتش عارف إن الموضوع هيبقى صعب أوي كده عليّ.. أنا كنت خايف عليها هي لو أنا اللي كنت قلت لها كده؛ بس لقيت إن الموضوع أصعب أوي عليّ.
وجرّبت أفاتح والدتي تاني، لقيت إن موقفها زي ما هو، وبصراحة أنا مش عارف إيه الحل للي أنا فيه ده، أنا مش قادر أنساها علشان أنا بحبها أوي، وهي كمان؛ بس هي مستحملة ومش مبيّنة.
أنا بجد من جوايا تعبان أوي، ومش عارف أعمل إيه، يا ريت يكون عندكم الحل لمشكلتي دي، وإزاي أحلّها، وجزاكم الله خيراً على ما تفعلونه لأنك أغلب آرائكم أنا باتفق معاكم فيها.
والسلام عليكم ورحمة الله وبركاته.
coopa


لو عايز تفضفض لنا دوس هنا