الطرق "اللوذعية" لإقناع طفلك بأكل الوجبات الجديدة والصحية

تعبتي من عناد ابنك ورفضه الدايم لمحاولاتك إقناعه بالأكل؟!
اتعذبتي مع إبنك وبتجري وراه دايماً بطبق الأكل وخصوصاً الخضار واللبن..
وهو بيرفض ومش راضي يأكل غير الحلويات والنواشف؟
محتارة ومش عارفة تعملي إيه؟!
دلوقتي مع قمر 14
هتقدري تأكّلي ابنك كل الأكل المفيد والصحي
وكمان هنقول لك إزاي تدخّلي أصناف جديدة في وجباته...
خليكي معانا...
لو طفلك مش بيأكل الأكل الجديد
خذي بالك من إن رفض طفلك للأكل الجديد ده شيء طبيعي جداً؛ لأن الأطفال دايماً بيحبوا يعندوا ويجربوا يقولوا كلمة لأ..
وعلشان كده هتلاقيه دايماً بيحاول يتمرّد على أوامرك ونصايحك، وأكتر طريقة ممكن يعبر بها عن عصيانه هي الأكل، وهيحسّ بانتصاره لما يشعر بغضبك وثورتك عليه..
وعلشان كده ممكن تطبّقي النصايح دي، واللي هتريحك من الموضوع المزعج ده للأبد:
1- لو كره الأكل الجديد مش معناه كرهه للأكل كله: أوقات كثيرة بيرفض الأطفال أي نوع جديد من الطعام لما بتعرضه عليهم الأم لأول مرة، وده مش معناه إنهم مش بيحبوا الأكل الجديد كله، لكن معناه إنهم وجدوه مختلف عن أي أكل تذوقوه قبل كده، ولأنهم ببساطة ما اتعودوش إنهم يستخدموا حاسة التذوق، والملمس والرائحة.
2- اعرضي صنف جديد من الأكل على فترات: حاولي إنك تقدمي لطفلك نوع جديد من الطعام على فترات متباعدة؛ بحيث إنه يتعود عليه ويحبه، لكن بلاش تجددي وتغيري في أكله على فترات قصيرة، وخصوصاً مع الأطفال الصغيرين أوي علشان بالطريقة دي مش هيلحق يتذوّق أو يحب أي نوع فيهم وهيحس بالحيرة.
3- استمري في محاولاتك ولا تفقدي الأمل سريعاً: خدي بالك من إن الطفل مش متوقع إنه يقبل أصناف الطعام الجديدة إلا بعد 10 أو 12 محاولة منك بإقناعه على الأقل، علشان كده لو حاولتي معاه مرة أو اثنين ورفض محاولاتك دي ما تغضبيش وتتعصبي وتفقدي الأمل أو يصيبك الملل منه، لكن لازم يكون عندك صبر وطولة بال، ولازم تعرفي إن الطفل مش غبي ولو وجدك بتستسلمي لرفضه للأكل اللي بتقدميه وبتخضعي لرغبته، فاعرفي إنه مش هياكل أي حاجة من الأصناف اللي بتقدميها.
4- خلي أكلك ممتع وسهل: لازم تعرفي إن الأطفال بينجذبوا جداً للأكل الملون اللي شكله جميل ومنسّق، وبيحبوا جداً إنهم يلعبوا وهمّ بيأكلوا، علشان كده حاولي إنك تجمّلي الأكل على قد ما تقدري، وممكن تشتري أطباق وصواني للأكل بتحتوي على لعب مبسطة ورسومات جميلة زي السيارات والعرائس والشخصيات المشهورة زي باربي وسوبر مان وسبايدر مان.
5- حافظي على كتم مشاعرك: خذي بالك من إن الأطفال بيبقوا شاطرين جداً في معرفة مشاعر اللي أمامهم، ولو أنتِ من النوعية اللي بتغضب وتثور بسرعة حاولي إنك تتحكمي أكثر في أعصابك وماتبينيش ثورتك دي أمام طفلك؛ علشان هو كده هيحس بانتصاره عليكي بإنه حقق رغبته في إعلان عصيانه وإشعارك بالغضب، وإذا وجدتِ إنه مش عايز يأكل نوعية الطعام دي فبلاش تغضبي، لكن حاولي تمهليه وقت وتعيدي محاولتك بدون أي ثورة.

حاولي إنك تقدمي لطفلك الخضار بشكل جذاب وشهي يشجعه إنه يأكل منه
لو طفلك مش بيأكل الخضروات
من أكبر المعارك اللي بتدخل فيها الأم مع طفلها هي معركة إقناعه بأكل الخضروات، واللي فيه أطفال كثير أوي بيرفضوا ياكلوها؛ لأنهم ما بيستطعموش طعمها، وبيستسهلوا أكل حاجات ثانية مش بتكون في نفس فائدة الخضار..
ولو كنتِ عايزة ترتاحي من صداع الموضوع ده تقدري تنفذي الطرق دي:
1- اعرفي إن الممنوع مرغوب: تأكدي إن معظم الأطفال لما بيلاقوا إن الأم بتعرض عليهم صنف أكل معين علشان فايدته مثلاً مش بيكونوا منجذبين ليه، بقدر ما بينجذبوا للأكلات اللي الأم بتمنعها عنهم، علشان كده ما تضغطيش على طفلك بأكل الخضروات، لكن خليكي ذكية وحطيها عنده في مقام الحلويات اللي مش بتسمحي بيها في أي وقت، وحاولي وأنتي بتقطعي خضار السلطة مثلاً أو خضار الغذاء أنك تمثلي عليه إن الأكل من الخضار ده ممنوع، وبكده هتلاقيه بيحاول يسهيكي، ويأكل منه ويحبه ويبتدي يتعود عليه.
2- خذي بالك من كلامك: في معظم الأحيان بتكوني إنتي السبب في إنك تكرّهي طفلك في أكل الخضروات، لما تحوليه بطريقة كلامك لعقاب، وتخلي الأكلات المضرّة أو غير المفيدة زي مكافأة له، وده بيتم عن طريق جمل زي "لو خلصت كل الخضار اللي في الطبق هاديك شيكولاته مثلاً أو أي حاجة حلوة" فإنتي بكده بتخليه يتعلق بالشيكولاته والحلويات، ويفقد اهتمامه بكل الخضروات والأكلات المفيدة.
3- خضارك جذاب وشهي: حاولي إنك تقدمي لطفلك الخضار بشكل جذاب وشهي يشجعه إنه يأكل منه، بإنك تقطعيه وترصيه في الطبق على شكل وردات أو وجوه الحيوانات، ويفضل كمان إنك تنوعي في ألوان الخضار زي إنك تقدمي له الخس الأخضر والجزر الأصفر والطماطم الحمراء والفلفل الملون.

خليكي قدوة لطفلك في شرب اللبن
4- ما تستخدميش القوة والابتزاز: فيه أمهات كتيرة بتستخدم طرق زي القوة والابتزاز في إنها تضغط على أطفالها؛ علشان ياكلوا الخضروات، زي إنها ما تسمحش لطفلها بإنه يقوم من على المائدة إلا لما ياكل كل الخضروات الموجودة في طبقه؛ لأن الطرق دي ممكن تأتي بنتائج عكسية، وتزيد من كراهية الطفل للخضروات بدل من إنه يحبها أو حتى يتعود عليها، والأحسن إنك تبعدي الطبق عنه وتقدميه له مرة ثانية لما يكون جعان.
5- خليكي قدوة لطفلك: ماينفعش إنك تقولي لطفلك كل الخضار واشرب لبن، وهو شايفك مش بتحبي تأكليه ولا حتى بتشربي لبن، علشان كده لازم تاكلي قدامه الخضار ويشعر بحبك ليه علشان هو كمان يحبه ويأكله.
6- اضحكي عليه: لو عايزة تأكّلي لطفلك نوع معين من الخضار حاولي تضحكي عليه وتحطيه له في الأكل من غير ما ياخد باله، زي الخيار أو الجزر مثلاً، فإنت ممكن تشوفي هو بيحب ساندوتشات إيه، وتحشي الساندوتش بقطع صغيرة من الخضار اللي إنتي عايزاه.
وبكده يكون موضوعنا خلص
يا رب يكون عجبكم
ولو إنت ليكي تجارب مع طفلك متعلقة بموضوعنا النهارده
نحب جداً إنك تشاركي بها معانا