حددي نوع بشرتك.. باختبار بسيط

عايزة أهتم ببشرتي بس مش قادرة أحدد نوعها!!
بشرتي ساعات باحس إنها دهنية، وأوقات تانية باحس إنها جافة.. ومش عارفة أتعامل معاها إزاي؟!!
أسئلة كتير بعتّوها لنا، ودايماً كانت مشكلتكم إنكم مش عارفين تحددوا نوع بشرتكم، ومش عارفين تتعاملوا معاها إزاي وعلى أي أساس..
والنهارده هنعمل مع بعض اختبار بسيط، تقدري تحددي به نوع بشرتك، وتعرفي إيه مميزاتها وعيوبها، علشان تعرفي تتعاملي معاها على أساس صحيح...
لأن البشرة النّضرة هي سر جمال أي بنت، وهي المراية الحقيقية اللي بتوضّح حالتك الصحية والنفسية..

ودلوقتي يلّا نبدأ الاختبار..
وكل اللي عليكي إنك تنظّفي بشرتك كويس جداً من أي شوائب أو آثار ماكياج...
وهاتي مراية وبصّي على بشرتك كويس..
وجاوبي على الأسئلة دي...

* هل بشرتك بتلمع؟
أ- لا مش بتلمع خالص.
ب- جافة وفي بعض المناطق بيظهر عليها قشور.
ج- بتلمع من عند منطقة الأنف بس.
د- بتلمع كلها.
* شكل المسامات الموجودة على بشرتك؟
أ- طبيعي.
ب- ضيقة جداً.
ج- واضحة.
د- واسعة جداً.
* بشرتك في المراية شكلها إيه؟
أ- نضرة وصافية وطرية.
ب- الجلد رقيق جداً وجاف.
ج- بتلمع من الجبهة والأنف والذقن.
د- بتلمع مع إحساس بالتهاب في بعض المناطق.

* لما بتحرّكي إيدك بالراحة على وشك كله، بتشعري إنها..
أ- مرنة ولينة.
ب- جافة جداً.
ج- فيها دهون على الجبهة والأنف.
د- مليانة بالدهون في كل المناطق.
* هل بتشعري إن جلدك مشدود في المنطقة اللي حول العينين والأنف؟
أ- دايماً.
ب- على فترات منتظمة.
ج- بعض الأوقات.
د- لا .
* هل بتعاني من ظهور البثور والحبوب؟
أ- نادراً جداً.
ب- لا أبداً.
ج- أحياناً.
د- دايماً.
* هل بتعاني من ظهور خطوط وتجاعيد على بشرتك؟
أ- بسيط جداً.
ب- عندي تجاعيد وعميقة جداً.
ج- عند مناطق التعبير بس (يعني خط الضحك وحول العين).
د- لا.
* إيه اللي بيحصل لما بشرتك بتتعرض للشمس؟
أ- بتحمرّ بس.
ب- بتلتهب.
ج- لونها بيبقى برونزي.
د- بتاخد لون برونزي لامع.
ودلوقتي بعد ما جاوبتي على الأسئلة كلها، إحسبي عدد الأسئلة اللي كان جوابك عليها بالاختيار (أ)، وعدد الأسئلة اللي جاوبتي عليها بالاختيار (ب)، وعدد الأسئلة اللي جاوبتي عليها بالاختيار (ج)، وعدد الأسئلة اللي جاوبتي عليها بالاختيار (د)...

البشرة العادية من أقل أنواع البشرة اللي بتقابل مشكلات
لو كانت إجاباتك على 5 أسئلة أو أكثر بالاختيار (أ)..
تبقى بشرتك عادية:
والبشرة العادية من خواصّها إن أنسجتها بتفرز الدهون بشكل معتدل ومتوازن، والبشرة نفسها بيكون شكلها مرن وطري وفيه صحة.
وعموماً البشرة العادية من أقل أنواع البشرة اللي بتقابل مشكلات، ومش بتحتاج لعناية مكثفة، لأن أقل اهتمام بيها بيجيب نتيجة، وحتى مع تقدُّم العمر بتقدر تحتفظ بنضارتها وإشراقها.
وكل اللي عليكي إنك تغسليها مرتين يومياً بغسول مخصص للأطفال، وتستخدمي لها كريم ترطيب مناسب للبشرة العادية.

أصحاب البشرة الجافة دايماً بيحسّوا إن بشرتهم مشدودة ومقشّرة
لو كانت إجاباتك على 5 أسئلة أو أكثر بالاختيار (ب)..
تبقى بشرتك جافة:
وأصحاب البشرة الجافة دايماً بيحسّوا إن بشرتهم مشدودة ومقشّرة وبيظهر عليها الجفاف في بعض المناطق، وخصوصاً بعد غسلها، وكمان بتظهر عليها قشور، وآثار عروق زرقاء عند منطقة الخدود.
كمان المسام بتاعتها بتكون صغيرة جداً، لدرجة إنها بتكون غير ملحوظة، وبتكون أكثر عرضة للتجاعيد المبكرة، وظهور آثار التقدُّم في السن أسرع من باقي أنواع البشرة.
ولو كانت بشرتك من النوع الجاف يبقى لازم تهتمي جداً بنوعية الأكل اللي بتتناوليها، وتركزي على الأطعمة اللي بتحتوي على فيتامينات A، C، E والفيتامينات دي بتكون موجودة في أطعمة زي الكبدة واللحوم الحمراء ومنتجات الألبان، والبرتقال والفلفل الأخضر، والبطاطا والسبانخ.
كمان راعي إنك تستخدمي لها غسول يومي مناسب للبشرة الجافة ويكون خالي من الصابون، ويفضل إن الغسول ده يكون فيه نسبة كبيرة من المواد الدهنية والمرطبات، وراعي وإنتِ بتجففي بشرتك، إنك تربّتي عليها برقة جداً من غير ما تفركيها، لأن البشرة الجافة بتكون حساسة جداً.

أصحاب البشرة المختلطة بيضطروا يتعاملوا مع نوعين مختلفين من أنواع البشرة
لو كانت إجاباتك على 5 أسئلة أو أكثر بالاختيار (ج)..
تبقى بشرتك مختلطة:
النوع ده يعتبر من أصعب أنواع البشرة في التعامل، لأن أصحاب البشرة المختلطة بيضطروا يتعاملوا مع نوعين مختلفين تماماً عن بعض من أنواع البشرة.
وأصحاب البشرة المختلطة غالباً بيكون عندهم منطقة الجبهة والأنف والذقن دهنية، أما منطقة الخدود بتكون جافة.
وهي بتنقسم لنوعين: بشرة مختلطة جافة، وبشرة مختلطة دهنية، وبالنسبة للبشرة المختلطة الجافة فَدي بتكون جافة جداً ومحْمرّة من عند منطقة الخدود، أما البشرة المختلطة الدهنية فَدي بتلاحظي إن منطقة الأنف والذقن والجبهة فيها دائماً عليها دهون زيادة، أما منطقة الخدين فبتكون عادية.


علامات التقدم في السن بتظهر على البشرة الدهنية بشكل أقل من باقي أنواع البشرة
لو كان إجاباتك على 5 أسئلة أو أكثر بالاختيار (د)..
تبقى بشرتك دهنية:
وأصحاب البشرة الدهنية بيحسّوا إنهم في مشكلة كبيرة ومالهاش حل، لإنهم بيشتكوا من مشكلات كتير زي المسام الواسعة، واللمعان اللي بيظهر عليها بسبب الدهون، ده غير الحبوب اللي بتظهر على بشرة وشهم أو جسمهم طول الوقت.
لكن أنا عايزة أطمّن أصحاب البشرة الدهنية شوية وأقول لهم إنها كمان لها ميزة عظيمة جداً وهي إن علامات التقدم في السن بتظهر عليها بشكل أقل من باقي أنواع البشرة.
ولو إنتي بشرتك دهنية، فيا ريت ما تقلقيش خالص، وتعرفي إن كل اللي عليكي إنك تهتمي بيها شوية زيادة، وتاخدي بالك جداً من نظافتها بشكل يومي.
ولازم تهتمي بتنظيفها كل يوم 3 مرات بصابون طبي زي ديتول، أو صابونة كبريت، بس ماتكتريش عن 3 مرات لأن غسيل البشرة بشكل مبالغ فيه بيحفزها إنها تفرز دهون بشكل أكبر، ويُفضّل إنك تستخدمي الماء الساخن في غسيلها علشان المية السخنة بتساعد على التخلص من الدهون الزائدة، وخلّي بالك إنك تجففيها بالراحة جداً.
كمان لازم تخلّي بالك جداً من أكلك، وتهتمي بأكل الخضار والفاكهة الطازة، وتشربي مية كتير، وتبتعدي عن الأكلات اللي بتكون مليانة بالدهون وكمان المشروبات الغازية، وإوعي تنسي كريم الحماية من الشمس، واختاري النوع السائل منه، لأنه بيكون مناسب أكتر للبشرة الدهنية.

ودلوقتي بعد ما عرفتي نوع بشرتك إيه..
تابعينا على "قمر 14" علشان هنعرف من خلال حلقات "جمالك من الطبيعة مع رانيا"...
إزاي نتعامل مع بشرتنا بأنوعها المختلفة بطرق طبيعية جداً..
سلام،،،