عزومة 9 رمضان مع الشيف "يسري"

زي ما وعدناكم إننا كل أسبوع هنقدّم لكم عزومة مميزة جداً مع الشيف "يسري"...
النهارده هنشوف مع بعض فكرة لوجبة جديدة ممكن تعمليها لأسرتك أو تعمليها لما يكون عندك عزومة... وعلى فكرة الوجبة اللي معانا النهارده بالرغم من إنها جديدة إلا أن مقاديرها بسيطة جداً وفي متناول الجميع..
يلّا نشوف مع بعض الشيف "يسري" هيعمل لنا إيه؟!!
شوربة البصل بالتوست والجبنة
المقادير:
* كيلو بصل
* ملح وفلفل
* 2/1 كوب جبنة رومي مبشورة
* 5 أكوب شوربة فراخ
* توست
* زعتر
* حبهان
* زبدة

الطريقة:
1- أول حاجة هبتدي أقطع البصل كله إلى شرائح متساوية في الحجم.
2- هجيب حلة وهحط فيها معلقة زبدة، وهحطها على النار وهضيف إليها البصل، وهقلبهم مع بعض لغاية ما ألاقي إن البصلة دبلت.
3- بعد كده هضيف الشوربة للبصل ومعاهم الزعتر والحبهان والملح والفلفل وهخليهم على النار لغاية ما البصل يستوي.
4- هجيب التوست وهحط عليه الجبنة المبشورة، وبعد كده أدخله في الفرن علشان الوش يحمر.
5- بعد كده هجيب طبق الشوربة، وهحط فيه شوربة البصل وعليها قطع التوست بالجبنة المبشورة.. وبالهنا والشفا.

إضغط لمشاهدة الفيديو:
سلطة التبولة
المقادير:
* بصلة خضراء مقطعة قطع صغيرة جداً
* 2 كوب برغل منقوع في الماء
* 4/1 كوب عصير ليمون
* 2/1 كوب زيت زيتون
* 15 حزمة بقدونس
* نعناع مفروم
* 2 طماطم
* ملح
الطريقة:
1- هقطع البقدونس قطع صغيرة لغاية ما أحس إنه بقى ناعم جدا.
2- بعد كده هضيف عليه البرغل بعد ما أصفيه من الماء، وبعد كده هضيف عليهم النعناع وعصير الليمون والبصل الأخضر وزيت الزيتون والملح.
3- بعد كده هقطع الطماطم إلى قطع صغيرة جداً وهضيفها على الخليط اللي حضرناه، وهقلبهم كلهم مع بعض، وهحطهم في طبق السلطة.. وبالهنا والشفا.

إضغط لمشاهدة الفيديو:
فطائر بالجبنة
المقادير:
* رقائق هاشة من السوبر ماركت
* 8/1 كوب جبنة موزاريلا مبشورة
* 8/1 كيلو جبنة بيضاء
* 1/8 كيلو جبنة جوده مبشورة
* 2 معلقة نعناع أخضر مفروم
الطريقة:
1- أول حاجة هعملها هي إني هخلط الجبنة البيضاء مع الجبنة الموزاريلا مع النعناع كويس.
2- هجيب الفطيرة اللي عندي وهبتدي أحشيها بخليط الجنبة اللي عملته، وبعد كده هضغط عليها جامد وألفها زي القطايف.
3- هكرر الخطوة اللي فاتت لغاية لما ألاقي كل الرقائق اللي عندي خلصت، وبعد كده هبتدي أرصها في صينية الفرن، وبعد كده هدخّل الصينية في الفرن لمدة نص ساعة أو لغاية ما الفطائر وشها يحمر.. وبالهنا والشفا.

إضغط لمشاهدة الفيديو:
موزة البتلو بالليمون المخلل والأرز بالفلفل الملون وحبة البركة
المقادير:
* كيلو لحمة موزة بتلو
* معلقة حبهان ناعم
* فلفل ألوان
* حبة البركة
* ليمون مخلل
* 2 بصلة
* مستكة
* 2 كوب أرز
* أوراق بقدونس للتزيين
الطريقة:
1- أول حاجة هقطّع اللحمة قطع صغيرة وهرش عليها الحبهان الناعم والملح والفلفل.
2- بعد كده هجيب حلة فيها زبدة وهسيّح فيها حبوب المستكة، بعد كده هضيف إليها اللحمة علشان تتشوّح، وهقطّع البصل شرائح وهضيفه على اللحمة، وهقلّبهم مع بعض، وبعد كده هسيبهم على النار لغاية ما يستوا مع بعض.
3- هجيب البصلة التانية، وهقطعها إلى قطع متوسطة الحجم، وبعد كده هجيب الفلفل الرومي والأحمر والأخضر والأصفر وهقطعهم لقطع متوسطة الحجم، وبعد كده هشوّحهم بزيت وزبدة مع بعض على النار لمدة خمس دقائق.
4- بعد مرور الخمس دقائق هضيف إليهم حبة البركة مع الأرز، وهقلّبهم كويس لمدة عشر دقائق، وبعد كده هضيف إليهم 2 كوب ماء بنفس مقدار كوب الأرز، وهسيب الأرز لغاية ما يستوي.
5- هجيب طبق التقديم، وهحط فيه الأرز وعليه اللحمة والليمون المخلل وممكن أزين الطبق بأوراق البقدونس.. وبالهنا والشفا.

إضغط لمشاهدة الفيديو:
تارت الموز بالكراميل والكريم شانتيه
المقادير:
* 2 باكو بسكويت عادي "مفروم"
* كوب سكر
* كوب كريمة
* كريم شانتيه
* موز
* كوب زبدة (سايحة)
الطريقة:
1- أول حاجة هعملها هي صوص الكراميل وده هعمله بإني هجيب طاسة وهحطها على النار، وهحط فيها السكر وأول ما لون السكر يتغيّر ويعمل صوص لونه بني أطفي عليه، وبعد كده هحط عليه الكريمة.

2- بعد كده هجيب البسكويت الناعم المفروم وهقلّبه مع شوية زبدة لحد ما يتجانس ويعمل عجينة.
3- بعد كده هجيب صينية وهفرد عليها ورق ألومونيوم؛ بحيث إنه ياخد شكل الصينية.
4- هبدأ بعد كده أفرد البسكويت على الصينية وهدخله الفريزر لمدة 45 دقيقة علشان يجمد.
5- بعد مرور 45 دقيقة هخرّج البسكويت من الفريزر وهشيل بالراحة ورق الألمونيوم وهحطه في طبق مدوّر.. بس قبل ما هحطه على الطبق المدور هجيب شوية كريم شانتيه وهفردهم في طبق التقديم وهحط عليهم البسكويت المجمد، وبعد كده هقطع الموز على البسكويت المجمد.
6- بعد كده هفرد باقي الكريم شانتيه على الوش، وهغطي كل الحروف بالكامل.
7- آخر حاجة هعملها إني أحط صوص الكريم كراميل بشكل عشوائي.. وبالهنا والشفا.

إضغط لمشاهدة الفيديو:

وبكده تكوني جهزتي لأسرتك وجبة فطار لذيدة وسهلة..
وفي انتظار آرائكم وأسئلتكم..
ونشوفكم على خير الأسبوع القادم...
مع وجبة جديدة ولذيذة،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************