عزومة 5 رمضان

عصير الزبادي بالأناناس
العصير ده مفيد ومنعش جداً، وكمان طريقته سهلة...
المقادير:
* كوب زبادي منزوع الدسم
* كوب عصير أناناس
* معلقة صغيرة فانيليا
* كوب مية كبير
* 4 مكعبات ثلج "اختياري"
الطريقة:
اضربي كل المكونات دي مع بعضها في الخلاط، وبعد كده صبيها في كاسات العصير، وضيفي إليها مكعبات الثلج.

*****************

شوربة الفاصوليا البيضاء بالخضار
شوربة الفاصوليا البيضاء بالخضار
المقادير:
* 1/2 كوب فاصوليا بيضاء
* كوب بطاطس مقشرة ومقطعة مكعبات متوسطة الحجم
* ثمرة فلفل أخضر مقطعة قطع متوسطة الحجم
* ثمرة فلفل أحمر مقطعة قطع متوسطة الحجم
* ثمرة جزر مقطعة قطعاً متوسطة الحجم
* 3 معالق سمنة أو زيت
* 3 أكواب شوربة فراخ أو لحمة
* ملح وفلفل
* أوراق بقدونس للتجميل
الطريقة:
1- هاتي الفاصوليا وانقعيها في مية لمدة يوم أو اسلقيها في المية، وبعد كده اغسليها كويس بمية باردة وحطيها في المصفاة.
2- هاتي صينية وحطي فيها السمنة أو الزيت، وبعد كده ضيفي الفاصوليا وباقي الخضار، وقلبيهم مع بعض كويس، وبعد كده ضيفي إليهم باقي المقادير، وسيبيهم على النار لغاية ما الخضار يستوي، وبعد كده اغرفيها في طبق الشوربة وجمليها بأوراق البقدونس.

*****************

سلطة الحمص بزيت الزيتون
سلطة الحمص بزيت الزيتون
المقادير:
* كوب حمص جاف
* 1/2 كوب زيتون أسود مقطع شرائح
* بصلة مقطعة قطعاً صغيرة جداً
* 2 معلقة كبيرة أوراق كزبرة، مفرومة فرماً ناعماً
* فص ثوم مدقوق مع معلقة ملح
* 1/8 معلقة صغيرة فلفل أحمر مطحون
* معلقة كبيرة زيت زيتون
* 2 معلقة كبيرة عصير ليمون
الطريقة:
1- هاتي الحمص واغسليه كويس وبعد كده انقعيه في المية لمدة 5 ساعات.
2- بعد مرور الخمس ساعات هاتي الحلة واغلي فيها الحمص بس خدي بالك إن النار تكون متوسطة الحرارة، وسيبيه على النار لمدة ساعتين أو لغاية ما تلاقي إن الحمص بقى طري.
3- صفي الحمص من المية وسييبه لغاية ما يبرد، وبعد ما يبرد ضيفي إليه باقي المقادير وقلبيهم مع بعض كويس، واضربيهم كلهم مع بعض في الخلاط، حطي الخليط السابق في طبق السلطة، ورشي عليه من على الوش زيت الزيتون.

*****************

أرز بالبسلة والفراخ
أرز بالبسلة والفراخ
المقادير:
* 2 كوب أرز مغسول
* 2 بصلة صغيرة
* 1/2 كيلو فراخ بانيه
* كوب بسلة
* ملعقة صغيرة زنجبيل
* ملح وفلفل
* زبدة
الطريقة:
1- اغسلي البانيه وانقعيه في مية بها ملح وليمون، وسيبيه لمدة 10 دقائق، وبعد كده قطّعيه لقطع صغيّرة.
2- شوّحي البصل في الزبدة لغاية ما لونه يبقى ذهبي، وبعد كده ضيفي عليه الزنجبيل، وقطع الفراخ والملح والفلفل والبسلة وقلّبيهم كلهم مع بعض، وبعد كده ضيفي عليهم شوية مية وسيبيهم لمدة 10 دقايق أو لغاية ما يغلوا.
3- بعد كده ضيفي الأرز، وزوّدي كمية المية بحيث تغطي سطح الأرز، وسيبيهم يغلوا على النار، وبعد كده وطي النار عليه وسيبيه لغاية ما الأرز يتشرّب.

*****************

فطيرة بالمكسرات والفواكه المجففة
فطيرة بالمكسرات والفواكه المجففة
المقادير:
* 2 كوب دقيق
* كوب كبير زبدة مقطعة
* 1/2 كوب سكر
* 2 بيضة
* صفار بيضتين
* 2 معلقة صغيرة عصير ليمون
* كوب تين مجفف أو قراصيا مقطعة
* 2 معلقة كبيرة زبيب
* 2 معلقة كبيرة عصير برتقال
* معلقة كبيرة قشر برتقال مبشور
* معلقة كبيرة مربى تين أو برتقال
* 2 معلقة كبيرة عين جمل
* 1/2 كوب لوز
* معلقة صغيرة قرفة
الطريقة:
1- حطي الدقيق في طبق كبير، وضيفي إليه قطع الزبدة واخلطيهم ببعض بإيدك، وبعد كده ضيفي إليهم البيض والسكر وصفار بيضة، وقلبيهم مع بعض كويس، وبعد كده ضيفي إليهم عصير الليمون واعجنيهم بإيدك وبعد ما تتأكدي إن الخليط ده بقى عجينة متجانسة غطيها بغطاء بلاستيك وحطيها في الثلاجة لمدة نص ساعة.
2- حطي التين أو القراصيا في كوباية كبيرة فيها مية مغلية وغطيها لمدة 15 دقيقة، وبعد كده صفيها من المية وقطعيهم لقطع صغيرة، وحمصي اللوز وعين الجمل وافرميهم.
3- اخلطي الزبيب، والتين، وعصير البرتقال، وقشر البرتقال، واللوز وعين الجمل، والقرفة والمربى مع بعض.
4- طلعي العجينة من التلاجة وافرديها على سطح مغطى بشوية دقيق؛ بحيث يكون سمكها 1/2 سم. وبعد كده قطعيها إلى دوائر باستخدام فتحة كوباية مستديرة.
5- حطي معلقة صغيرة من الحشو في منتصف كل دائرة، واضغطي على الحواف كويس بإيدك علشان تقفل كويس.
6- سخني الفرن على درجة حرارة 180 درجة مئوية، وادهني صينية الفرن بالزبدة، ورصي عليها الفطائر، وادهني سطح الفطائر بصفار البيضة المتبقية ورشي على الوش قرفة، وبعد كده دخلي الصينية في الفرن لمدة نص ساعة أو لغاية ما وشها يحمر وبعد كده خرجيها.

*****************

وبكده تكون خلصت عزومتنا النهارده، وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة اوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة ومش عارفة تعمليها ابعتي وقولي لنا عليها واحنا هنقول لك على الطريقة على طوووول..


وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************